WILLEMSTAD.- Maarten de Jong, direktor di Wereldstage, ta splika ku for di aña 2022 ta mira un oumento di hende ku ta bin fo’i Hulanda pa hasi trabou boluntario na Kòrsou.
De Jong ta splika EXTRA: “Interes pa hóbennan ku ke bin Kòrsou pa pasa stazje a dupliká den aña 2022; nos a haña hopi petishon. Pero no solamente hóbennan a mèldu nan mes pa kore stazje, pero tambe tin hopi hende ku a buska informashon pa bin Kòrsou pa hasi trabounan boluntario.” Gran parti di e personanan ta entre 20 i 30 aña.
For di 2022 kantidat di hende ku ta bin Kòrsou pa hasi trabou komo boluntario a oumentá hopi fuerte, e direktor ta splika.
Segun De Jong tin tres sektor na unda hendenan ku ta bin Kòrsou pa hasi trabou komo boluntario por hasi trabou. “E promé tereno ta relashoná ku hende. Den e sektor ei boluntarionan por hasi trabou na institutonan manera Hamiëd òf Betesda. Banda di esei tin hende ku ta bin Kòrsou pa yuda protehá medio ambiente i naturalesa. Ku ta nifiká ku boluntarionan por hasi trabou na por ehèmpel Stichting Uniek Curaçao.’ De Jong ta splika ku un otro tópiko importante ta relashoná ku animalnan. ‘Kon nos ta atendé ku bestianan?’
“Boluntario ta yuda entre otro pa kita plèstik for di naturalesa i laman, pasobra e ta hopi peligroso pa turtuganan. Pero tambe ta yuda kachó i pushi ku ta biba riba kaya.” De Jong ta splika ku e tópiko ei ta hopi popular bou di boluntarionan ku ta bin Kòrsou.
En general e ta bisa ku hende ku ta bin Kòrsou pa hasi trabou komo boluntario ta bon biní. “Durante e periodo komo boluntario nan ta hasi trabou i na mesun momento sera konosí ku e pais i duna un kontribushon positivo na nos isla.”

LAGA UN KOMENTARIO

Please enter your comment!
Please enter your name here