Hendenan ta ‘cool off’ den e fòntein Trocadero pegá ku Eiffel Toren durante dje kalor intenso di ayera na Fransia.
GENEVE, (AFP).- Organisashon Mundial di Salú (OMS) a informá ku for di 21 di yüni te ku ayera a registrá mas ku 1.300 morto adishonal na Oropa debí na e ola di kalor. Por sierto ayera e kalor a laga rèkert máksimo na Alemania, Polonia i Repúblika Cheka.
Desena di miónes di persona ayera a sufri temperaturanan ekstremo na Oropa debí na un ola di kalor ku durante di siman a kuminsá den paisnan wèst di Europa i ku durante di wikènt a avansá pa e parti ost.
E informashon ofisial ayera di OMS a referí na mas ku 1.300 morto. Segun direktor Tedros Adhanom Ghebreyesus a skirbi riba X, na “e momento ei 150 mion hende tabata biba den un kalor ekstremo, hopi skol a sera i retnan di koriente tabata konfrontá problema”. Mas aleu el a bisa ku e kalor ta un “asesino silensioso” i ku kasnan di famia, sitionan di trabou i skolnan oropeo no a keda konstruí pa soportá e tipo di temperatura ku tabata dominá.
E grupo di sientífikonan di World Weather Attribution a señalá ku e ola di kalor ta esun mas intenso hamas registrá na Oropa i lo ta algu “virtualmente imposibel” den luna di yüni sin e kambio di klima.
Vários rèkert
Repúblika Cheka a registrá ayera otro rèkert di temporada ku 41,9 ºC na Doksany, den nort di Praag.
Na Alemania pa di dos dia konsekutivo a registrá un nivel sin presedente di te ku 41.7 grado.
Na Polonia, un bosero di Instituto di Meteorologia a bisa na AFP ku nan a registrá un rèkert di 40.5 den e siudat Slubce, den wèst dje pais.
Na Suisa nan a marka un nivel rèkert di kalor pa luna di yüni, ku 39 grado.
Na Fransia, outoridatnan di salú a anunsiá ayera ku for di 24 di yüni a registrá den kareda di 1.000 morto mas ku e kustumber.
