DUBAI, Emiratonan Arabe.- Peleanan entre forsanan di gobièrnu di Yemen, apoyá pa Arabia Saudita, i rebeldenan hutí, respaldá pa Iran, a laga mas ku 140 morto for di djasabra mèrdia te ku djadumingu mainta.
E peleanan den zùitwèst di Yemen pa kòntròl dje akseso pa yega Laman Kòrá a reanudá djaweps, despues ku den yüli e akuerdo di 2022 pa no ataká otro a basha den oro debí na e instabilidat kresiente den e region pa motibu dje guera entre Merka ku Iran.
E ofensiva di huties a buska pa kòrta e akseso pa e siudat ku haf di Moca i avansá pa e zonanan rònt dje kanal di Bab el Mandeb. E paso marítimo ei a gana importansia pa tránsito di petrolio saudita despues ku e kanal di Ormiz a keda blòkiá pa Iran for di momento ku e guera a kuminsá.
Ayera, dos ofisial di ehérsito yemeni a deklará na AFP ku 84 di esnan ku a pèrdè na bida ta pertenesé na nan i ku mayoria a muri debí na atake di rakètnan.
Di su parti, kuater fuente di e forsanan rebelde a indiká ku 57 di nan hòmbernan a muri den mesun periodo.
Segun un balansa realisá pa AFP despues di a papia ku vários fuente militar i médiko di ámbos banda, mas ku 300 sòldá i algun sivil a muri for di djaweps último.
