Mientras tantu, e museo Louvre a habri su portanan bek pa públiko. Kada dia di nobo míles di bishitante ta drenta e museo pa disfrutá dje obranan di arte den e museo.
PARIS, Fransia (AFP).- Mas ku 150 muestra di ADN i otro markanan importante a keda hañá na e sitionan dje espektakular robo di prenda den e museo di Louvre, segun prokurador di Paris, Laure Beccuau, kende a mustra di ta “optimista”. Análisis “ta duna speransa, ounke importante ta trabou di laboratorio”, segun Beccuau a deklará na prensa.
E resultadonan kisas den próksimo dianan lo habri mas pista, spesialmente si e outornan tin antesedente. Segun e prokurador, e videovigilansia “a yuda pa sigui” e rekorido dje atrakadornan tantu den Paris komo den otro departamentonan dje pais. Mas aleu e la referí na imágennan públiko i privá (di kaya, bankonan, empresanan) ku lo keda studiá..
El a ekspresá a boluntat “pa mas lihé posibel hasi detenshon pa haña e hoyanan promé ku saka e piedranan i smèlt e metalnan”.
E manera ku prensa ta kubri e kaso aki ta duna speransa ku e outornan no ta tribi na move muchu ku e hoyanan, kalkulá na 88 mion euro. “Mi ke ta optimista”, segun e prokurador di Paris. Reportahenan ta bai rònt mundu for di djadumingu i e robo di Louvre ta notisia tur kaminda.
