Un miembro di agensia nashonal di droga ta tene warda dilanti kantidat grandi di pakinan di kokaina ku a keda konfiská djaluna último.
SANTO DOMINGO (AFP).- Ministerio públiko dominikano a informá di konfiskashon di mas ku 2 tòn di kokaina durante di un operashon huntu ku Merka, dianan despues ku a sera e ofisina anti narkótika di Merka na e pais karibense pa motibu di sospecho di korupshon. E konfiskashon a tuma lugá djadumingu serka dje provinsia di Peravia, den parti zùit dje isla, despues di “mas ku 15 ora siguí di persekushon di un ‘speedboat’”, segun Ofisina Nashonal di Kontròl di Droga (DNCD).
E boto, di mas o ménos 30 pia, a bini for di Sur Amérika kargá ku “un kargamentu di 2.049 paki di aparentemente kokaina”, segun informashon ofisial. E konfiskashon ta esun di mas grandi den historia di República Dominicana, segun bosero di DNCD, Carlos Devers. Outoridatnan mas aleu a informá di aresto di seis dominikano den e operativo huntu ku un komando norteamerikano.
E gobièrnu di presidente Donald Trump a kuminsá bombardiá supuesto botonan di kontrabanda den Karibe for di komienso di sèptèmber, insistiendo ku ta un guera kontra di supuesto teroristanan narko ku ta operá for di Venezuela. Sinembargo, nunka a presentá pruebanan konkreto ku e botonan tabata envolví den narkotráfiko, loke a habri kaminda pa un debate intenso riba legalidat dje operashonnan. Rep. Dominicana poko despues a kuminsá kolaborá ku e lucha anti narkótiko di Washington i a anunsiá vários konfiskashon di droga.
Dia 12 di febrüari último e embahador norteamerikano na Rep. Dominicana a anunsiá di ta sera e agensia antidroga DEA na Santo Domingo. Djis despues un supervisor di DEA na Rep. Dominicana a keda arestá dor di Merka i akusá di soborno i froude ku visa
