Famia di prezunan ku ta pendiente pa nan sernan kerí keda poné den libertat, ta pasa di dia i anochi dilanti di prizònnan sperando pa e re-enkuentro ku nan famia.
CARACAS (AFP).- Mas ku 200 prezu polítiko na Venezuela a deklará nan mes den wèlga di hamber, inkluso un militar argentino akusá di terorismo, komo protesta kontra nan eksklushon for di e resien aprobá lei di amnistia. E medida a kuminsá djabièrnè anochi den e prizòn Rodeo 1, pafó di Caracas. No tur e detenidonan a uni na e protesta, ku ta sigui un wèlga di hamber di famianan siman pasá dilanti di un otro prizòn.
Parlamento venezolano djaweps último a aprobá e lei di amnistia. Ta un inisiativa di e presidente Delcy Rordriguez, kende a asumí poder despues di kaptura di Nicolás Maduro.
E lei ta ekskluí kasonan relashoná ku temanan militar, ku ta esnan mas frekuente den El Rodeo 1. Gobièrnu a bisa ku un komishon spesial lo studia e kasonan aki i no ta deskartá mas pordon den futuro.
“Nos ta anunsiando i denunsiando e wèlga di hamber di tur e 213 prezunan polítiko”, segun Danielis Garcia, integrante di e Komishon pa Libertat di Prezunan Polítiko di Venezuela. “Nana tuma e desishon pa drenta wèlga di hamber pa motibu di resultadonan dje lei di amnistia, kaminda e gran mayoria no ta keda benefisiá”, segun Shakira Ibarreto, yu di un polis detené den 2024.
A para bishitanan: Outoridatnan a para tur bishita di fin di siman pa loke ta famia di prezunan ku ta den protesta. Tabata e promé señal ku tin un medida na kaminda. Despues, famianan dje prezunan ku no a uni na e grupo den wèlga di hamber por a drenta i sali for di e prizòn. Segun e famianan, vários dje prezunan ku no a drenta den wèlga di hamber tabata warda pa nan risibí bishita di fin di siman tuma lugá, pa despues uni nan mes na esnan ku ta den protesta.
Segun e presidente di Parlamento, Jorge Rodriguez, 1.500 prezu polítiko na Venezuela a solisitá nan libertat atrabes di amnistia. El a splika ku “e solisitutnan ta keda atendé di forma dirèkt” i komo tal djasabra último a bolbe liberá 80 persona.
Mas aleu Rodriguez a duna di konosé ku 11.000 hende kendenan ta den libertat kondishonal, lo haña libertat kompleto danki na e lei ku a pasa.
