Flor so a keda tras kaminda tabatin e klup nokturno Jet Set. Denunsia ta oumentando kontra dje propietarionan.
SANTO DOMINGO (AFP).- Hustisia di República Dominicana a risibí 52 denunsia kontra dje doñonan di e diskotèk ku a basha den otro luna pasá i a laga 233 morto, segun ministerio públiko.
Te ku ayera no tabatin ningun hende akusá pa e suseso dje ‘niteclub’ Jet Set dia 8 di aprel durante un presentashon dje kantante di merengue Rubby Perez, kende tambe a pèrdè su bida den e insidente.
E abogado Plutarco Jaquez a entregá un demanda na fiskal pa detenshon di Antonio Espaillat, representante di e famia ku ta doño dje ‘niteclub’ Jet Set.
“Nos ta bai te na e último konsekuensianan”, segun Jaquez, kende ta representá famia di kuater dje víktimanan.
Un bosero di fiskal a bisa na AFP ku te na e momentonan akí tin 52 proseso den hustisia, entre demandanan sivil ku ta buska indemnisashon i kehonan ku ademas ta eksigí un akshon penal.
Outoridatnan ainda no a duna konklushon dje investigashonnan riba e tragedia, pero si a rekonosé ku tin un bashí legal den temanan di leinan di infrastruktura. Ekspertonan ta di akuerdo ku otro ku e tin di haber ku un dak muchu pisá i falta di kontròl adekuá pa mira si e konstrukshon téknikamente tabata korekto.
Espaillat dia 23 di aprel a bisa ku e edifisio “semper” tabatin problemanan di filtrashon i ku “nunka” el a keda supervisá dor di outoridatnan. Ademas el a bisa di ta na disposishon pa kolaborá ku hustisia.
E insidente di Jet Set ta un dje tragedianan di mas grandi den e pais karibense.
Den 2023 un kantidat di 38 persona a muri den un eksploshon na San Cristobal na mei ora den outo for di Santo Domingo. Dos dékada promé, 136 prezu den e prizòn Higuey a pèrdè nan bida den un kandela.
