SANLIURFA, TURKIA, AFP.- E ekiponan di reskate na Turkia i nort di Siria tabata luchando djamars den friu pa buska sobrebibientenan despues di e temblor violento di djaluna. Outoridatnan ya a registrá mas ku 7.800 morto.
Yudansa internashonal mester a yega den e zonanan afektá pa e temblor i réplikanan di esaki djamars for di Fransia i Qatar. E promé temblor tabata di 7,8 riba skala di richter i por a sinti esaki te na Líbano, Chipre i nort di Irak.
Na Turkia, e kantidat di mortonan a subi na 5.894 miéntras ku na Siria por lo ménos 1.932 persona a muri.
E presidente turko, Recep Tayyip Erdogan, a dekretá un estado di emergensia pa un periodo di tres luna den dies provinsia na sùitost afektá pa e temblor.
Segun Erdogan, 45 pais a ofresé yudansa inkluyendo Ukrania, ku a anunsiá ku lo manda 87 persona pa yuda ku búskeda na Turkia, apesar ku e pais ta den guera ku Rusia.
Na Siria, mas ku 300 militar ruso ya ta na e pais pa yuda ku reskate.
