Al Fayed ku historial largu di akusashon di abusu seksual di parti di su trahadónan femenino.
GRAN BRETANIA (AFP).- Mas ku 7 5 víktima di violensia seksual di parti di Mohamed Al Fayed, eks-propietario di Harrods, kende a fayesé den 2023 , te ku awor a risibí un “indemnisashon kompleto” for di un fondo kreá pa e empresanan grandi di luho. E mas ku 75 víktima ta forma parti di 259 persona ku a presentá un solisitut di indemnisashon den kuadro dje posibilidat pa hasi esei i ku tabata habrí te ku 31 di mart último.
“Te ku awor, mas ku 75 di esnan ku tabata víktima, a risibí un indemnisashon kompleto via dje programa”, segun a keda anunsiá pa e Programa di Reparashon di Harrods, den un komunikado. E sobrá kasonan ”lo keda revisá i tratá te ora tin un solushon”, segun a bisa mas aleu.
E anunsio di Harrods a yega algun ora despues ku un organismo di kòntròl polisial britániko, a indiká di a habri un investigashon kontra di un agente aktivo i kuater otro eks-miembro di kuerpo, sospechá di a ignorá denunsianan di agreshon seksual kontra di Al Fayed, tempu ku ainda e tabata na bida.
Despues di un dokumental di BBC riba e kaso, den sèptèmber di 2024, polis di London a rekonosé di a risibí -promé ku morto dje multimionario egipsio – 21 deklarashon di hende muhé kontra dje magnate, sin ku nunka a prosesá esakinan.
Segun e entidat d kòntròl polisial (IOPC), “den e etapa aki sinku persona a keda informá ku ta eksistí un investigashon kontra di nan, pa supuesto mal kondukta”.
E aña aki polis a interogá kuater persona -tres muhé i un hòmber- sospechá di komplisidat den e kaso Al Fayed.
