WILLEMSTAD.- Djaweps i djabièrnè último kual tabata Bispu di Pasku i Pasku, outoridatnan a repartí mas o ménos 60 prosèsverbal for di bispu di Pasku te ku di dos dia di Pasku. Riba Pasku a repartí alrededor di 40 prosèsverbal. E prosèsverbalnan tabata direktamente relashoná ku medidanan di Covid-19. Segun polis a indiká, e infrakshonnan pa kua mas tantu but a ser duná, tabata pa violashon di e orario di ‘toque de queda’ i inkumplimentu ku e orario di sera di negoshinan. Aparte di esei polis a tene ‘roadblock’ na diferente sitio i a kontrolá 67 vehíkulo. Dos shofùr a risibí un prosès verbal pa seguro di outo ku a kaduká.

Riba e promé dia di Pasku, e komportashon di públiko en general por wòrdu konsiderá komo aseptabel.

Di dos dia di Pasku, polis a repartí 20 prosès verbal, di kua seis (6) tabata pa bendementu di alkohòl na un establesimentu ku no ta permití i unu (1) pa seramentu di negoshi ku tabata habrí despues di e orario ku e mester tabata será. Durante di ‘roadblock’ ku a tene riba Schottegatweg-Noord, 13 persona a risibí un but pa faltamentu ku toke de keda. Apesar di esaki, den mayoria kaso siudadanonan a tene nan mes na e reglanan i petishon hasí dor di outoridatnan, pa keda kas i tene e selebrashon den grupo familiar chikí. Na algun sitio menor, polis mester a hala atenshon di algun persona ku no tabata kumpli ku distansia sosial.

Polis den un komunikado a indiká ku nan ta spera e komportashon aki den e próksimo dianan tambe i ku te asta esaki mehorá, miéntras ta aserkando fin di aña. Kuerpo Polisial ta kontentu i gradesido tambe pa e kontrol sosial, di siudadanonan ku ta yama 917 òf ta app na e number 5242480, na momentu ku nan konstatá un situashon ku ta kontra di regla.

E kontrolnan aki ta kontinuá.

LAGA UN KOMENTARIO

Please enter your comment!
Please enter your name here