PSI (Perspektiva Sosten Integral) Skuchami ta un lugá sentral den nos komunidat. Komunidat di Kòrsou no por sin un instansia manera Skuchami. Esaki pasobra nos tur na tur nivel tin di aber ku kuido i salu mental. E ta algu sumamente importante pasobra tur hende tin mente i tur hende por haña nan enfrentá ku situashonnan mental den nan bida. I p’esei Skuchami ta sumamente importante pa si surgi kualke problema mental, mester tin un back up ku hendenan por haña kuido di tal manera ku nan por re stabilisá nan i sigui funshoná i bin bèk den balansa i sigui ku nan bida di un manera òf otro, segun e direktor interino Andre Curiel a splika Djasabra. Skuchami ta un fundashon i ta kai bou di e ministerio di SOAW i GMN. Skuchami resientemente a inougurá nan edifisio nobo den Otrabanda Mgr Nieuwindstraat 15 kaminda ántes tabata situá e ofisina di dòkter Ferrier. Tambe e aña aki Skuchami a kumpli 20 aña di eksistensia. Promé ku esei e tabata karga e nòmber di departamento salu mental pero a independisá e servisionan di gobièrnu i el a bira Skuchami.
Trabou di Skuchami…
PSI Skuchami tin 4 filial, kada un tin un tim multidisiplinario konsistiendo si sikiater, sikólogo, trahadó sosial, enfermera sosial sikiátriko, ortopedagogo. Nan ta atendé ku Kòrsou kompleto, for di chikí te grandi i ku diferente problema di salu mental. Angelique La Cruz mènedjer di operashon a referí aki na problemanan sikológiko, kosnan ku ta bin ku emoshon manera trouma, rou, depreshon, ansiedat, tur problema emoshonal sikológiko i tambe tin e parti sikiátriko ku ta esun di skisofrenia pero tambe riba un mucha ku tin di keda diagnóstiko si e tin ADHD, e parti di depreshon ku mester di remedi nesesario ku ta basta amplio, tambe tin edukashon kaminda ta duna guia na mayornan ku ta konfrontá problema ku edukashon di nan yunan, hendenan riba 60 aña ku hopi bia ta ripara ku nan tin problema di soledat òf ta kuminsá lubidá ku tambe nan ta duna e evaluashon sikiátriko i e guia di enfermera sosial sikiátriko, tambe Skuchami ta e instansia ku riba base boluntario por hasi petishon pa ingreso di mucha i hóben den internat. Mas aleu nan tin pikèt pa trouma ku nan ta traha huntu ku polis i slachtofferhulp pa kasonan ku ta rekerí esaki. I esaki segun Angelique ta algun di nan tareanan. Den e áreanan ku mas petishon pa yudansa Skuchami ta haña, Angelique a menshoná Otrobanda i Brievengat
Kasi 400 yamada pa asistensia…
Teniendo na kuenta e situashon di COVID-19 ku nos pais ta pasando aden, ta pone ku PSI Skuchami su man ta mas yen ku normal. Angelique a splika ku nan a kuminsá for di momentu ku e problemátika a kuminsá nan a habri un liña di yudansa ku pueblo di Kòrsou por yama si nan ta sinti sierto problemátika. For di momentu ku a habri e liña di yudansa aki, nan a haña te ku awor kasi 400 persona ku a yama. Ora lockdown a kita e klientenan por a bin ofisina di Skuchami bèk. E situashon awor ta ku por yama i traha un sita, despues ku haña e karta di dòkter di kas.
Komportashon di mucha, e problema di mas grandi…
E problema mental ku mas Skuchami ta konfrontando último periodo ta problema di komportashon serka mucha i hóben sigui pa depreshon serka adulto. E problema di komportashon serka e hóben ta hopi grandi. Skuchami ta atendé e problema aki na promé lugá ku un kombersashon di orientashon pa asina por haña un bista kla kiko ta pasando ku e kliente i kiko e petishon pa yudansa ta. A base di e informashon ku haña segun Angelique, nan ta sinta tur djabièrnè den reunion multidisiplinario i a base di e síntomanan di e persona ta diagnostiká e kaso. Si un mucha por ehèmpel no ta sinta ketu na skol por kuminsá pensa ku e por tin ADHD òf no tin struktura na kas. Ora diagnostiká ta traha un plan di tratamentu kaminda ta skohe ki disiplina ta bai atendé ku e kaso. Si ta problema di edukashon na kas, i ku un mayor no por duna struktura, ta duna guia di edukashon. Pero si mira ku kisas ta ADHD e persona tin ta hasi evaluashon ku ta den man di e sikólogo i sikiater. I ta duna finalmente e mayor i e mucha e guia kon pa sigui anda ku e kondishon ku e tin.
Pubertat un problema…
Hopi bia den kaso di edukashon na kas ta ku e mayornan mas tantu ta traha kuné i pa asina por yega na un balansa huntu ku e mucha tambe, sino e lo no logra. Dunando un ehèmpel Angelique a bisa ku mayornan hopi bia no sa kon atendé ku pubertat di e mucha. Ora e mucha yega su pubertat kosnan ta kambia. Un mayor ta ferwaktu ku e mucha ta keda tende di dje, loke e bisa ta konta siendo ku na e momentu ei mester kuminsá laga los un tiki. Esun tin di komprondé ku tin regla i e mayor tin di komprondé ku e yu ta bisando grandi i tiki tiki mester laga lòs.
Dos generashon diferente…
I banda di esaki ta bin aserka ku nos ta den un temporada ku dos generashon kompletamente distinto. Andre a indiká ku mayornan a lanta den un régimen basta struktura i stret i awor aki nan ta keda konfrontá ku yunan ku for di 3 pa 4 aña ta mira tur sorto di kos por ehèmpel via di media sosial i e dos nan ei si no literalmente no por komuniká ku otro, bo ta haña un ‘botsing’ di generashon. Nan ta bida literalmente den dos diferente mundu. E yu ta mira i sa den sierto direkshon i e mama no por volg e. Ta bin aserka ku na Kòrsou tin e situashon di hopi mama soltero i esei tambe ta trese su problemanan kuné.
Eduká e mayor…
Angelique ta pro ku for di e yu ta den barika, un mayor haña guia i sentimentu. Prinsipalmente den e promé kuater di un mucha ta e base i hopi bia ta haña u esei ta laga hopi di deseá riba diferente área. E parti emoshonal di mama ku yu, kon e yu ta pega na e mama, e mama di e mayornan ta pone struktura pero tambe skol ta hunga un ròl. Tin hopi mucha ta haña e stèmpel di nivel abou pero esei ta falta di stimulashon for di chikí. Nos a lanta ku nan ta kanta i lesa ku nos, siña koó i konta for di chikí pero hopi mucha ta karesé di esei. Por mira hopi mucha awor tin di bai e skolnan manera MLK, ZMLK, AGO.
Ekspreshonnan spantoso…
Na Kòrsou hopi bia nos ta pensa ku komo e yu tin di keda kas su so pasobra mama tin di traha, ta hinka den mucha den un situashon di defisiensia di edukashon. Andre ta pensa ku tòg esei no ta kompletamente e kaso. Pasobra si mira na Oropa tur kaminda e mama ta traha ounke einan e sirkunstansianan di trabou ta mas fleksibel i tin mucha mas trabou partaim. Pero e aktividatnan tambe ta muchu mas. Riba su mes segun Andre no ta un motibu pakiko e kosnan ta kana manera nan ta kana aki. Echo ta si ku nos sistema di lanta yunan ta e pensamentu básiko ku bo ta tende, ekspreshonnan ku mayornan ta hasi ku ta spantoso. I mester para ketu na edukashon pasobra einan ta kuminsamentu di tur kos. Si skol bai robes bo ta haña e situashon na internat, kriminalidat i ta einan tur kos ta kuminsá. Ta einan e palu ta spùit i haña su brasanan.
Mester di mas sikiater…
Skuchami ta tin basta trabou pero por kumpli ku esaki a base di e personal ku nan tin ku eksepshon di e parti di sikiátriko, ku ta un doló di kabes pa nan yega na e sikiaternan. Generalmente nan kuerpo di personal ta hopi dominá. Di otro banda segun Andre si tabatin e fondo nan i posibilidatnan ku por ekspandé, tin muchu mas área pafó di loke nan ta hasiendo awor aki ku nan ke hasi i ku komunidat mester di dje tambe. Nan ta limitá na finansa i no por kibra heru ku man. Denter di e kuadro finansiero awor di Skuchami nan ta na nivel pa loke ta e personal ku eksepshon di sikiater. Andre ta kere ku mester di mas sikiater na Kòrsou. Si nan ke atendé e problemanan ku tin i pa nan krese i hasi tur e trabou ku nan lo tin di hasi den komunidat mester bisa ku sigur tin mester di oumentá e kantidat di sikiaternan.
Yudansa den su ambiente…
E meta di Skuchami ta pa e hende keda biba den su ambiente. E yudansa ta ambulante, pa trata e hende pa e no mester bira malu i pa keda interná. Ménos hospitalisá i ménos yudansa ambulante. I na momentu ku e persona keda interná nos no ta papia di hende loko, manera den boka di pueblo nos ta gusta bisa. Angelique i Andre tur dos a yama esaki simplemente un problema sikiátriko e persona tin. Tin kaso kaminda un persona mester di time out un ratu pero e persona ei no ta keda interná na klínika Capriles pero kisas un PAS afdeling pa e haña su rùst un ratu.
Mihó kalidat…
Di awor padilanti Skuchami lo ke pa alsa nan kalidat pa nan por duna nan klientenan. Esei segun Andre Curiel dor di hisa nan nivel di profeshonalidat, hisa nan nivel di e sentimentu di kalidat esta ku un sistema di kalidat ku nan ta bai implementá, outomatisá nan registrashon, tur eseinan lo redundá den un nivel mas haltu di servisio ku Skuchami ta duna nan klientenan. Esei ta nan meta. Kada organisashon ku ta respetá su mes lo bai pa duna e mihó resultado pa ku su klientenan. Nan ta tumando e pasonan nesesario pa yega asina leu. Nan a kaba di tuma un mènedjer di kalidat den servisio pa guia e sistema a yega na kalidat total.
No tene bèrgwensa…
No duda si bo mester di yudansa pa tuma kontakto ku Skuchami. Si bo por kombersá ku famia i bisiña i no ta logra, yega serka Skuchami pa nan wak kon por yuda. Angelique ta pidi pa no desesperá pasobra semper tin un lus na horizonte. Orkan no ta keda pa semper i solo lo sali., Den bida nos tur a yega di pasa den algu horibel, buska yudansa i asina bo por surpasá hopi kos.
Andre ta pidi esnan rondó di e hendenan ku ta pasa den temporada difísil; no mustra dede, no isolá e persona mas ku e ta, si bo señalá sierto kambio di aktitut serka hende, lo hala for di dje pero keda dun’é sosten i apoy’é pa e buska ayudo. No warda te ora e kos krese mas ainda i bira un bòm pasobra meskos ku e ta tuma tempu pa krese te Sali for di man, e tempu ku el a tuma e ta tuma pa bini bèk den balansa tambe., Mas lihé tuma paso pa yega na un solushon, mas ménos e tempu, e kompleksidat di e problema ta pa atendé. No keda warda debí na bèrgwensa òf ignorá, e tabú ainda ta hopi grandi na Kòrsou pero pa yuda esnan yega na bo, bo tin di pasa over di e barera di e tabú ei pa buska yudansa.
Andre Curiel (direktor interino)
Angelique La Cruz (operation manager)
PSI Skuchami;
Montaña Kaya Girasol z/n 7673612/6900593
Brievengat Kaya John Monsanto z/n 7388717/6903306
Tera Cora Silberie 10-11 8647330/6900595
Otrabanda Mgr Nieuwindtstraat 15 6900591
Facebook; PSI-Skuchami
