WILLEMSTAD.- Minister Javier Silvania ta informá ku pa mas tarda 31 di desèmber 2024 deklarashon di impuesto riba ganashi mester ta entrega. Durante e último simannan tabatin algun desafio tékniko ku e portal online di deklarashon di Servisio di Impuesto. Danki na un kolaborashon konstruktivo entre konseheronan di impuesto i Servisio di Impuesto, entretantu, a logra resolvé mayoria di e problemanan prinsipal. Esaki ta nifiká ku e último fecha pa entregá deklarashon definitivo di ‘winstbelasting’ 2023 ta keda djaluna 31 di desèmber 2024. E ‘winstbelasting’ ku e kontribuyente debe tambe mester ta pagá pa e mesun fecha akí. Si e deklarashon no ta entregá na tempu òf si e impuesto no ta pagá na tempu, lo sigui un ‘aanslag’ ku un multa durante luna di yanüari di e aña nobo.
Kompará ku e deklarashonnan mensual pa ‘loonbelasting’ i ‘omzetbelasting’, e porsentahe di kumplimentu pa e deklarashon anual di ‘winstbelasting’ ta konsiderablemente mas abou. Pues, oumento di e porsentahe aki tambe ta un meta importante pa Servisio di Impuesto. Imponé ‘aanslag’ ku un multa despues di e último fecha di entrega ta un di e medidanan pa stimulá kumplimentu. Lo apliká e mesun método aki pa loke ta trata e deklarashon provishonal di ‘winstbelasting’ pa aña 2024, ku su último fecha di entrega ta djaluna 31 di mart 2025. Esaki ta nifiká ku durante aprel 2025, lo imponé ‘aanslag’ ku multa si e deklarashon provishonal no ta entregá na tempu òf si e impuesto ku mester paga no ta pagá na tempu. Pa motibunan tékniko, no tabata posibel pa imponé ’aanslag’ basá riba e deklarashon provishonal pa e aña ku ta kabando aki, pero pa 2025 si esaki lo ta posibel. Meskos ku tabata e kaso pa e aña aki, pa 2025 tampoko no tin mester di pidi suspenshon pa entrega definitivo di e deklarashon. Tur negoshi ku nan aña fiskal ta kana pareu ku kalènder anual, mester entregá nan deklarashon definitivo di ‘winstbelasting’ pa 2024 pa mas tardá djaluna 1 di desèmber 2025. Tuma nota: Esaki ta un luna mas tempran ku kustumber.
E aña ku ta terminando aki Ministerio Públiko a persiguí diferente negoshi penalmente pa motibu di no entregá deklarashon di ‘winstbelasting’. Entretantu, esaki a konkluí den diferente kondena penal. Pa e motibu aki, Servisio di Impuesto ta konsehá tur empresario pa tene nan atministrashon na òrdu i pa entregá nan deklarashon di ‘winstbelasting’ i paga e ‘winstbelasting’ ku nan debe na tempu. Di e forma aki ta evitá multanan i asta posibel persekushonnan penal.
Riba inisiativa di Minister di Finansa, Javier Silvania, Servisio di Impuesto, SBAB, i Duana a dediká hopi esfuerso durante e últimonan añanan pa mehorá kumplimentu fiskal.
Minister ta informá ku esaki a resultá den un mehorashon signifikativo den komportashon di deklarashon i pago. Mirando e éksito i e oumento di entrada di impuesto relashoná ku esaki, lo sigui implementá e maneho aki sin kambio durante 2025.
