LOS ANGELES, AP.- Dos muhé mas a akusá públikamente ayera Donald Trump di ofensanan seksual entre nan un eks konkursante di ‘reality show’ kende su strea awe ta e kandidato presidensial republikano.
E denunsianan aki ta forma parti di vários muhé kendenan a sigurá den último dianan ku e magnate a pasa man riba nan òf a sunchi nan sin nan tabata ke esaki.
Trump mes ta nenga e akusashonnan aki i a yama e muhénan mentiroso. Summer Zervos eks konkursante den The Apprentice” a bisa ku Trump a hasi insinuashonnan seksual no deseá kuné den un hotèl den Beverly Hills na 2007, miéntras ku e fotograf Kristin Anderson a sigurá ku e magnate a agredié seksualmente den un klup nokturno na New York na kuminsamentu di dékada 1990.
Zervos di 41 aña a presentá ayera na e konferensia di prensa kompañá di Floria Alrred, un abogado famoso di Los Angeles kende ta asesorá e muhénan ku a akusá Trump di kondukta seksual robes.
Zervos kende a partisipá den The Apprencite a bisa ku algun tempu despues el a komuniká ku Trump pa puntr’é riba algun trabou den un di su empresanan. El a bisa di a reuní ku Trump kaminda nan a papia riba trabou. Ora nan a yama otro ayó Trump a dun’é un sunchi riba su boka i a pidié su number di telefòn.
Zervos a sigui bisa ku algun siman despues Trump a yam’é pa invit’é na un reunion na un hotèl den un zona di Los Angeles. Den e di dos reunion Trump a bolbe bira seksualmente agresivo i a sunchi e riba su boka i a mishi ku su pechunan.
Zervos a rechasá i direpente Trump a kambia su aktitut manera ku tabata trata di un entrevista di trabou. Despues Trump a ofresé un trabou ku pago masha abou den un di su kompanianan di Gòlf.
