Djasabra último ainda tabata rekuperá restunan mortal di víktimanan dje temblor ku siman a asotá partinan di Colombia. Siman ta habri ku práktikamente nada di speransa pa haña mas sobrebibiente bou di edifisionan ku a basha den otro.
CALI (AFP).- Ayera Colombia a avansá den trabou pa limpia e áreanan asotá pa e temblor fuerte, ku masha poko probabilidat pa reskatá sobrebibientenan entre mas di un sentenar di hendenan ku ketu bai ta pèrdí.
E zonido di katapila i trùknan grandi den e zonanan mas afektá pa e temblor di 7.4 grado di djaluna siman pasá tabata loke ku mas a dominá durante fin di siman. Kasi 300 morto konfirmá i outoridat, te ku ayera, ainda tabatin e sifra di140 hende pèrdí, prinsipalmente den siudatnan ku wikènt último tabata kompletamente bandoná.
Den Pereira (wèst), un dje siudatnan mas asotá, mashinnan grandi tabata kita tonelada di betòn i traha seru grandi ku esakinan. Ya for di ayera no ta permití entrada di mas boluntario ku tabata yuda pa buska sobrebibientenan.
“E speransa pa haña mas víktima ku ainda ta na bida, ta poko”, segun ofisialmente a keda tres’é dilanti. “Ademas, bo ta sinti e kansansio, ta un kansansio mental” serka gruponan uniformá i esnan di hèlmnan oraño.
E zonido dje mashinnan awor ta tapa e silensio ku brigadanan di yudansa tabata pidi pa por skucha si tin bida bou dje ruinanan.
E temblor ta e promé prueba pa e gobièrnu dje derechista Abelardo de la Espriella, ku a konfrontá ku situashon di emergensia apénas tres dia despues di a drenta ofisina.
Djasabra último, el a pidi e presidente norteamerikano, Donald Trump, e suspenshon temporal di pago di sierto impuesto komo un manera pa yuda e pais.
Den kareda di 27.000 kas a keda destruí i hopi damnifikado no tin kaminda pa bai. Desena di hende ta drumi riba kolchonnan poné den kaya.
