Aqualectra ta pidi diskulpa pa interupshon koriente djasabra anochi
WILLEMSTAD.- E kompania di utilidat Aqualectra den un informe ofisial ta indiká ku djasabra 25 di aprel e kompania a konfrontá un interupshon riba e ret di koriente den oranan di anochi. Pa motibu di e interupshon aki, a skohe pa schakel koriente entre diferente bario entre 7’or pa 12or di di anochi. Esaki, pa evitá ku algun bario òf área ta keda sin koriente muchu largu pero tambe pa protehá e sistema i evitá ku e interupshon lo a bira un problema muchu mas grandi.
Segun Aqualectra, e motibu dikon e interupshon aki a surgi, tabata un kombinashon di diferente faktor. Durante e último dianan, tabatin tres mashin for di servisio pa por hasi algun reparashon i trabounan di mantenshon nesesario. Tanten ku e mashinnan aki tabata afó, e sistema di almasenahe di energia pa medio di bateria (BESS) a yuda sostené demanda di Kòrsou, huntu ku e produkshon regular, sin ku e klientenan mester a sinti muchu molèster. Sinembargo, ayera bientu a baha por kompletu durante henter dia, poniendo ku e produkshon di e mulinanan tabata hopi abou.
Esaki huntu ku e tres mashinnan ku tabata den reparashon a pone ku no por a karga e baterianan pa por pasa e demanda di anochi. Miéntras Aqualectra a premirá esaki siguiendo pronóstikonan di tempu, a kalkulá tambe ku un di e tres mashinnan ku ta den reparashon ya lo tabata den servisio bek di moda ku por a kumpli ku demanda sin ningun problema; ku e mashinnan huntu ku BESS. Sinembargo e mashin ku nan a kalkulá ku lo mester tabata bèk den servisio no tabata kla ainda, lokual a pone un peso èkstra riba BESS i e otro mashinnan den produkshon ayeranochi. Pues netamente pa evitá ku esaki lo a kousa un problema mas grandi, a skohe pa bai over na schakel durante e oranan di ayeranochi kaminda demanda di koriente tabata mas haltu riba nos isla i mantené un balanse.
Pa djadumingu 26 di aprel, tur kos ta mustra ku lo no tin mester di uza e sistema di Schakel mas. Produkshon di bientu ta na un nivel satisfaktorio, BESS ta kargá kompletamente i e kompania tin sufisiente mashin den funshon i tambe unu den reserva. E último dos mashinnan ku ta den reparashon ta planeá pa keda kla den e simannan benidero di moda ku esaki tambe ta yuda pone bèk na un nivel di produkshon kaminda e klientenan lo sinti molèster mínimo durante temporadanan di kalor ekstremo. Konstrukshon di un planta nobo di koriente, Salu Power Plant, tambe ta avansando ku pasonan firme pa asina kontinuá ku trabounan pa amplia e kapasidat i fundamentalmente sigui sirbi komunidat na tur momentu.
Aqualectra ta indiká ku nan ta konsiente ku, lokesea e motibu, pèrdè koriente nunka no ta un situashon agradabel. E kompania ta ofresé diskulpa di kurason pa e molèster ku esaki por a kousa. Nan a purba durante e oranan ku tabata schakel, pa tene komunidat informá via nan página sosial kua ta e barionan ku tabata sin koriente i kon largu kada periodo di schakel lo a dura. Pa keda na altura di kualke desaroyo, porfabor sigui Aqualectra su página di Facebook i Instagram.
