LONDON, AP.- E promé minister britániko Theresa May a bisa djamars ku e lo aseptá “kualkier” akuerdo pa Brexit ku Union Europeo. Ambos banda ta stanká riba e tema di frontera irlandes.
May a informá na su gabinete ku ainda e kombersashonnan pa un akuerdo ku UE ta stanká. Ambos banda ta buskando un forma pa garantisá ku lo no tin duana ni otro kontròlnan na frontera entre Northern Ireland, ku ta forma parti di Reino Uní, i Irlanda, ku ta miembro di UE.
E partinan ta elaborando un solushon komun pa Reino i UE. Sinembargo, e partidarionan di Brexit ta preshoná May pa no aseptá un solushon ku ta obligá London pa someté na normanan komersial di UE durante un tempu indeterminá despues di su salida den mart.
E dirigentenan di UE ta insistí ku e garantia na frontera yama “backstop” òf barera, ta efektivo solamente si e sosodé sin límite di tempu.
Debí na e fecha di salida, fiha pa 29 di mart, tempu ta kabando pa May yega na un akuerdo aseptabel tantu pa su gobièrnu konservador komo pa e paisnan di UE.
E negoshadó prinsipal di Union Europeo, Michel Barnier, a bisa ku e ekiponan negoshadó no ta serka di yega na un akuerdo.
