LONDON, AP.- E promé minister britániko, Theresa May, a atvertí djadumingu ku Gran Bretaña ta enfrentá “tempunan difísil” miéntras e ta prepará pa bandoná Union Europeo despues di referèndem na yüli.
Den un entrevista publiká djadumingu riba Andrew Marr Show, el a indiká ku no ta tur kos lo ta “simple” den e salida britániko di e bloke di 28 pais.
Den su promé entrevista amplio desde ku el a asumí kargo, May a bisa ku e lo no organisá elekshon antisipá, e pais mester di stabilidat.
E promé minister a papia ku Marr promé ku el a biaha pa China pa kumbre di G20. May a bisa ku e lo no “pretendé” ku abandono di Union Europeo ta fásil, apesar di algun dato ekonómiko positivo den último dianan.
Sinembargo, e mandatario a bisa ku e ta sigur ku Gran Bretaña lo kompletá su salida di e grupo ku éksito i lo haña oportunidatnan ekonómiko pafó di Union Europeo.