WILLEMSTAD.- RemaUni ta bisa ku mayornan ta preokupá ku e situashon di COVID den enseñansa pero kiko lo hasi si e muchanan keda kas, kon e mayornan ta hasi traha.
Pa diferente motibu mayornan ta preokupá:
Pasobra gobièrnu mes no ta riba un liña ku tur e partnernan den enseñansa. Di tur ángulo ta sali un otro rekomendashon, anto pa despues tende ku lo a sinta ku tur partido aktivo den vèlt di enseñansa. Kaminda tur e diferente opinionnan ku mayornan ta tuma nota di dje ta kontradiktorio. Ken nan tin ku kere?
Mayornan ta preokupá pasobra ta nèt un aña a pasa ku a hasi un inventarisashon pa wak kon leu nos skolnan ta den preparashon pa un pandemia i “lockdown”. Te awe ainda nada no ta reglá pa loke ta trata enseñansa en general pa ku “lockdown” i pa skol kontinuá virtualmente.
Mayornan ta preokupá pasobra tin un direktiva di skol ta menasá mayornan ku skohe pa tene nan yu(nan) na kas (pa miedu di kontagio) ku ta denunsiá nan na “Leerplicht ambtenaren”. E pregunta kardinal ta: E departamento aki ta funshoná?
Mayornan ta preokupá pasobra un gran parti di maestronan ta bou di tenshon. Tenshon di miedu pa kontagio di COVID-19 pero tambe miedu pa no tuma represaya kontra di nan si nan papia i trese nan preokupashonnan dilanti.
Mayornan ta preokupá pasobra tin mayor ku no ke pa perhudiká nan yunan di haña lès. Na nan pareser nada por stroba nan yu di bai over òf pasa èksamen final.
Mayornan ta preokupá pasobra kon ta hasi ku e muchanan na kas ora nan tin ku traha?
Mayornan ta preokupá pasobra tin un grupo di mayor ku no ke tende di e posibilidat ku skol ta será. Pero miéntras tantu skolnan a sera. Maestronan tin ku hasi nan trabou! Segun nan.
Mayornan ta preokupá pasobra tin diferente maestro ku no ta paresé na trabou pa motibu di malesa pero niun hende no ta bisa ki dia nan ta bèk. Tambe tin mucha malu, kua mucha ta infektá ku e vírùs? Ta amigu di nan yu? Tin peliger pa nan?
Mayornan ta preokupá pasobra nan ta bon konsiente ku algun skol no tiní fásil, ta lucha nan ta lucha segun nan forsa. Prinsipalmente e skolnan ku mayornan no por duna un aporte finansiero pa e mucha por risibí mihó enseñansa.
Mayornan ta HOPI MAS preokupá pasobra nan representashon no ta aktivo den skol. Lokual ku ta remarkabel ta ku ta papia sí na nan nòmber, kaminda nan no ta aktivo. For di inisio di e aña eskolar 2020/2021 no ta atmití mayor den kura di skol.
Komo e representantenan di mayornan den enseñansa RemaUni ke puntra na nòmber di tur mayor ku tin yu den enseñansa na TUR partner di enseñansa (esta Gobièrnu, Ministerio di enseñansa, inspekshon, direktivanan di skol, sindikatonan);
Boso a tuma un posishon serio i responsabel awor sí, pa loke ta trata enseñansa di nos yunan? Kon ta bai hasi despues di fakansi di Pasku di resurekshon?
