WILLEMSTAD.- Mester drecha situashon den bario pasobra esaki ta kompletamente neglishá. Asina lider polítiko di MAN-PIN, Giselle Mc William ta enfatisá. “Ta un realidat ku ekonomia a krese último dos añanan i nos ta mira esaki den sektornan di turismo i konstrukshon pero den barionan hendenan a keda atras den nan desaroyo. Habitantenan no por sali kana den nan bario pa motibu ku hopi kaminda no tin asera òf tin asera kibrá, roinan sushi i retraso den mantenshon di e ret di kloaka loke ta responsabilidat di Gobiernu”, Mc William ta deklará pa EXTRA.
E ta mustra ku resientemente CBS a duna di konosé ku 27.6 porshento di habitantenan ta indiká ku e molèster di mas grandi ku nan tin den bario ta kachónan sin doño ku ta kana rònt. “Hopi habitante ta duna di konosé ku nan no por kana trankil den nan bario.” Miéntras ku e lei di bienestar di animal, ku frakshon di MAN a presentá kuné, t’ei pa salbaguardiá bienestar di kachó i pushi, e lei mester sòru alabes pa e kachónan no ta kana lòs riba kaya. Pa e motibu akí tur doño di kachó, konforme e lei mester laga chep nan kachó. E kachónan riba kaya ta forma peliger pa habitantenan i tráfiko, Mc William ta sigui bisa.
“Banda di e situashon akí 10.6 porshento di hende ta haña ku barionan ta sushi. Yen yerba shimaron i sushi plamá riba kaya ku ta trese un situashon a-higiéniko ku bestia manera djaka i sangura. 22.9 porshento di habitantenan ta haña ku e situashonnan akí den bario ta un molèster pa nan medio ambiente i salú.”
Kasnan di FKP i partikular pará bashí den tur bario, Mc William ta sigui bisa, tambe ta reflehá e deterioro di nos bario. “Alabes ta nota ku mantenshon di kasnan a bai atras den mayoria bario di klase medio loke ta reflehá e situashon ekonómiko real di e klase media den nos pais. Esaki ta reflehá ku no opstante e kresementu ekonómiko, pueblo no a mira e kresementu aki bèk den su saku di un manera struktural i real pero tampoko den su bario.”
E lider polítiko di MAN-PIN ta mustra ku abase di vishon i maneho di e partido lo atendé ku problema di kachónan ku ta forma un molèster pa habitantenan i sòru ku tin un maneho struktural pa atendé ku sushedat den barionan. Tambe lo introdusí atrobe redukshon di impuesto te ku 3000 mil florin pa aña pa gastunan di mantenshon di kas. “Esaki ta duna habitantenan un alivio i sosten den mantenshon di nan kasnan.”
Tambe MAN-PIN ta bai hasi uso di prosesonan hurídiko vigente pa atendé kasnan ku pa kualke motibu ta pará bashí pa hopi aña. “Mester krea bibienda nobo den barionan i tambe yuda drecha e imágen di barionan atrobe. MAN-PAN ta bai enfatisá riba drecha barionan i sòru pa e struktura di konsehonan di bario unda habitantenan lo tin un bos pa desaroyo di nan bario”, Mc William ta finalisá bisando.
Foto:
