WILLEMSTAD.- Faltando 2 siman i mei promé ku elekshon, ta biba un preokupashon kresiente riba repartishon di karchinan di vota ku no ta kanando bon. Partido MAN-PIN a tuma nota di informashonnan ku ta sirkulá pero tambe ta haña informashon direkto serka personanan ku ta aserká e frakshon, dunando indikashon ku tin motibu bálido pa e preokupashonnan akí.
Lider polítiko di MAN-PIN, Giselle Mc William, den deklarashon pa EXTRA ta bisa ku tin siudadano ku a aserká e partido indikando ku e aña akí e no a haña karchi di vota miéntras su bisiña si a haña. Esaki ta kontrali na e situashon di kustumber kaminda semper e persona i su bisiña ta haña nan karchi di vota pareu nèchi den nan brivenbùs. “E dos bisiñanan ta vota na mesun ‘stembureau’. Ta kiko por a bai robes e aña akí? Ta straño tòg”, Mc William ta bisa.
Tambe MAN-PIN a tuma nota for di siman pasá di un siudadano ku a haña un kantidat di karchi di vota den su brivenbùs ku no ta di dje. Ku su rason e siudadano akí a puntra su mes ta ki bochincha ta pasando. “E siudadano akí a hasi un yamada riba ret sosial pa esun ku sa di ken e karchinan di vota por ta, pa tuma kontakto kuné. Pero meskos por pasa tambe ku un hende ku no ke molèster ta tira karchinan di vota ku no ta di dje afó.”
Pa kolmo, Mc William ta bisa, ku aparentemente a bin haña awor un kantidat di karchi di vota bentá kantu di kaya riba Piscaderaweg. Esaki tambe ta algu ku siudadanonan a menshoná riba retnan sosial. Aparentemente no a entregá e karchinan di vota ni na kas di hende ni tampoko a hinka nan den e ‘community box’ ku tin riba e mesun kaya aki. “Kiko a pasa eksaktamente no por bisa pero ta algu straño tòg?”.
Echo ta ku e informashonnan ku ta yega MAN-PIN ta di preokupashon i ta lanta interogatorio ta kiko ta pasando ku entrega di karchinan di vota. Pa e motibu akí Mc William ta bisa di lo bai pidi aklarashon serka ministernan konserní, manera minister di BPD, Shalten Hato i minister di VVRP Charles Cooper, pa sa kiko ta pasando ku entrega di karchi di vota.
Foto:
…Giselle Mc William…
