MCB determiná pa hasi Bankomátikonan mas sigur

WILLEMSTAD.-Malechornan a rementá un ATM di Maduro & Curiel’s Bank tambe awe mardugá. For di siman pasá ku tabatin e intento pa rementá e mashin na Marchena a pone ku MCB ta muchu mas alerta. No ta prome bia ku esaki ta pasa i por nota ku e modus operandi tambe ta mesun kos. Pa Banko Maduro ta importante su servisio na kliente i ta den e kuadro aki ku ta hasiendo evaluashon profundo kua medida ta tuma. Un kos ta sigur, MCB ta determiná pa hasi su Bankomátikonan mas sigur asina Ruthsella Jansen, miembro di gerensia di e banko a deklará na EXTRA.

Maduro & Curiel’s Bank ta pendiente investigashon di polis i komo tal no por divulgá muchu informashon relashoná ku e eksploshon di nan ATM na nan filial na Jan Noorduynweg. Den kombersashon ku sra. Jansen el a duna di konosé ku nan ta kontentu ku Curaçao Bankers Association tambe ta diskutí riba e desaroyonan aki i huntu ta traha na medidanan. Tur banko ta na altura di e desaroyonan i MCB sigur ku sa ku e rísiko tei ta mas prepará i ta kontemplando métodonan pa prevení.

Definitivamente mester hasi evaluashon pasobra di un banda tin e aspekto di seguridat pero na otro banda tin e servisio na kliente. Na Ulanda por tuma nota kon bankonan a sera bastante ATM, pero aya esei ta muchu mas fásil komo ku na Ulanda e komunidat a desaroyá hopi tempu kaba pa atendé ménos posibel ku plaka kèsh. Esei ta hasié mas fásil, pero na Korsou ainda e komunidat aki ta atendé hopi ku kèsh. Pues MCB su evaluashon mester ta hopi mas profundo ya komo ku e intenshon di a pone ATM rònt Korsou ta hustamente pa sirbi e kliente mas mihó. Ta mesun rosea mester traha pa hasi e ATM mas sigur i tambe pa e kliente ku mester hasi uso di dje. P’esei tambe ta bira krusial pa evitá di pone Bankomátiko na lugánan kaminda e riesgo ta mas haltu.

Komo parti di e evaluashon tambe por bini dilanti ku no ta habri mas ATM i asta ku por sera algun di esnan eksistente, pero mester hiba e diskushon ei ainda. Mester evaluá medidanan bon!

Ruthsella Jansen ta enfatisá ku MCB ta determiná pa hasi su Bankomátikonan mas sigur. Lo sigui guia e poblashon pa hasi mas uso di sistemanan giral, e.o online banking . Riba e parti digital tambe MCB lo perkurá pa mas seguridat i p’esei nan mester keda na altura di desaroyonan pa mas seguridat pa kliente komo banko mes.

 

SHARE

LEAVE A REPLY