Den un anochi
WILLEMSTAD – Den oranan di mainta informashon a yega na mesa di redakshon di EXTRA ku McDonald’s Saliña tambe e bira víktima di kiebro den oranan di anochi. Tur kos ta indiká ku e ‘modus operandi’ tabata igual ku esun na e otro dos filialnan di KFC. Na e McDonald’s aki tambe a kibra e bentana di ‘Drive Thru’ i logra bai paden pa hasi nan maldat. EXTRA no tin e informashon kiko e kriminalnan a logra bai kuné. Durante e investigashon a bin topa material di e ladronnan riba dak pues dunando indikashon ku nan tabata basta ratu okupá aki tambe. Polis lo tin ku duna e informashon ofisial di e kiebronan ku a tuma lugá tantu na KFC i awor ta sali na kla na McDonald’s tambe.
UPDATE: Sentral di polis di Kòrsou djaluna 10 di ougùstùs 2026 alrededor di 02.32’or a risibí informashon di kiebro ku a tuma lugá den un restorant di ‘fastfood’ riba Dr. W.P. Maalweg. Deskonosínan a fòrsa entrada via di e bentana di “Drive Thru” i penetrá den e establesimentu. Debi na entre otro reakshon rápido di vigilansia, e malechornan no a logra bai ku nada for di e restorant. Pa mas o menos 04.00’or, Sentral di Polis a risibí informashon di un otro kiebro ku a tuma lugá na un restorant di “fastfood” situá den Kaya Charles Maduro. Einan tambe malechornan a kibra bentana di “Drive Thru” i yega na e kaha fuerte. For di aki nan a saka e sèn kèsh ku tabatin den e kaha i bai ku esaki.
Aproksimadamente un ora despues, a drenta un otro yamada na Sentral di Polis, ku individuonan a kibra drenta na un restorant di “fastfood” riba F.D. Rooseveltweg.
Na e restorant aki tambe e sospechosonan a haña akseso na e kaha fuerte. Nan a logra kibra esaki i bai ku un montante di sèn.
Polis ta investigando tur e tres kasonan aki i ta hasi un yamada na esunnan ku por tin informashon tokante di e kiebronan aki, pa tuma kontakto ku polis na e number anónimo 108 of 917.
