WILLEMSTAD.- Ministerio di hustisia for di awor aki a saka reglanan ku esnan ku ta bai Fuikdag, ku lo ta riba e promé djadumingu di 2017, mester tene kuenta kuné. Fuikdag ta planiá pa tuma lugá dia 8 yanüari 2017. Segun ministerio di hustisia pa tur kos kana korekto, resientemente tabatin un reunion ku a tuma lugá ku Kuerpo Polisial di Kòrsou, Wardakosta, Inspekshon di Seguridat di Haf i Brantwer.

Meta di e reunion aki ta pa fiha reglanan estrikto pa ku e aktividat di Fuikdag i tur kos rondó di e aktividat aki, i pa evitá ku kosnan ta sali for di man. Ta bon konosí ku e evento aki a bira esun di riba awa di mas grandi, motibu pa kual e rísiko mará na dje tambe ta grandi.

E siguiente medidanan ta konta pa Fuikdag riba e promé djadumingu di yanüari: no ta duna pèrmit pa bendementu di bebida alkohóliko, no ta duna pèrmit pa pone vlòt òf kualke opheto flotante den Fuikbaai for di kua ta produsí músika òf ku e vlòt ta sirbi komo podio for di kual por kumpra bebida òf ta repartí material di reklamo grátis.

Pues no ta permití vlòt òf podio flotante den Fuikbaai. Tur boto ku ta partisipá na e evento aki, mester tin nan dokumentonan ofisial i tambe ta dispone di sufisiente “life vests” (di akuerdo ku e kantidat di hendenan abordo), komo tambe e artíkulonan nesesario di urgensia entre otro flùit etc.

Brantwer lo hasi kontrol pa loke ta trata hasimentu di barbekiú abordo di boto, kaminda ta eksistí peliger di kandela. Kapitan di kada boto ta responsabel pa su pasaheronan. Esaki ta nifiká ku no ta aseptá pa kontra di pago, fungi komo “taksi di awa” pa hiba pasaheronan na e sitio. E fenómeno di bai laga hende atras na Fuikbaai ta un problema grandi, spesialmente ora ku Fuikdag terminá pasobra nan no tin transporte pa yega tera bèk.

P’esei lo kontrolá estriktamente si tur boto tin e kantidat rekerí di pasahero abordo. No ta permití pa via di Santa Barbara Plantation kana bai Fuikbaai òf for di Fuikbaai kana pasa via di Santa Barbara Plantation. Fuikdag por keda bishitá ku boto i ku riba dje e kantidat di pasahero. Ora un kapitan di un dje botonan ku ta bai Fuikdag ta bandoná e aktividat, e ta responsabel pa tur su tripulantenan pa transportá nan di forma sigur for di Fuikbaai.

“Tur servisionan di yudansa pa 5’or di atardi lo tuma medida di para nan sosten i servisio. Despues di e ora aki tur aktividat lo para. Ta importante pa tur hende tene kuenta ku e medidanan ariba menshoná, pasobra outoridatnan kompetente lo aktua pa garantisá órden i seguridat.

LAGA UN KOMENTARIO

Please enter your comment!
Please enter your name here