MCALLEN, TEXAS, MERKA, AP.- E promé dama merikano Melania Trump a inisiá un bishita na dos instalashon na Texas ku tin mas di 2.300 mucha separá di nan mayornan ku a drenta Merka sin outorisashon.
E bishita ta na Upbring New Hope Children’s Center, un dia despues ku presidente Donald Trump a firma un dekreto pa para e separashon di e famianan. Sinembargo, e òrdu di entrega na inmigrantenan ilegal na hustisia kriminal ainda ta vigente.
Ta posibel ku e ta bishitá un otro sentro di detenshon kaminda periodistanan di The Associated Press a mira menornan di edat será den kouchi.
E presidente tabata bou di preshon intenso, asta di parti di e republikanonan i di e promé dama mes, despues di un furia generalisá despues di revelashonnan ku menornan di edat ta wòrdu separá di nan mayornan.
E biahe su ophetivo ta pa duna sosten na e muchanan ku ta sigui separá di nan mayornan, segun indikashon di Stephanie Grisham, bosero di e promé dama.
“E kier mira pa su mes kiko e situashon ta”, asina Grisham a bisa.
Kompañá pa e sekretario di Salú i Asistensia Sosial Alex Azar, señora Trump a reuní ku e direktor ehekutivo di e instalashon i otro miembronan di personal.
E promé dama a indiká ku presidente Trump ta na altura di e biahe i ta sosten’é totalmente.