WASHINGTON (AFP).- E promé dama di Merka, Melania Trump, ayera a hasi un deklarashon no sperá dilanti di kámaranan pa nenga akusashonnan – ku e no a spesifiká – riba su persona i e defuntu delinkuente seksual Jeffrey Epstein.
“E mentiranan ku ta relashoná mi persona ku e bergonsoso Jeffrey Epstein mester kaba awe”, el a bisa. “Esnan ku ta gaña riba mi ta karesé di prinsipionan étiko, humildat i rèspèt”.
E promé dama, nasé na Slovenia, a nenga di forma kategóriko kualke relashon ku Epstein, ku kende el a keda fotografiá huntu ku su kasá Donald Trump durante di nan añanan di bida sosial na New York. “Imágennan falsu i deklarashonnan riba Epstein i ami, a bin ta sirkulá riba retnan sosial pa algun aña kaba”, el a bisa.
Tene kuidou ku loke bosnan ta kere; e imágennan i historia aki ta kompletamente falsu”. Ku e divulgashon di miones di archivo di Epstein, despues dje aprobashon di un lei den e sentido ei den Kongreso, tambe a aparesé tur tipo di imágen riba retnan sosial, den último lunanan.
Epstein a muri bou di kustodia federal den 2019 miéntras e tabata spera su kaso pa akusashonnan di negoshi seksual ku menornan di edat, pero e skandal a lanta kabes na diferente okashon den e di dos mandato di Trump.
Trump mes tambe a nenga kualke vínkulo ku delitonan di Epstein. “Nunka mi tabata na altura dje abusu di Epstein pa ku su víktimanan. Nunka mi tabata envolví, di ningun manera i no a partisipá. “Nunka m’a drenta e avion privá di Epstein i nunka a bishitá su isla privá”, segun Trump.
