KINGSTON, Jamaica (AFP).- E poderoso orkan Melissa ayera a destruí Jamaica ku bientunan feros i áwaseru torensial, kombirtiendo su mes den e tormenta di mas fuerte ku hamas a pasa riba e isla. Despues di esei el a dirigí su mes pa Cuba, lagando te ku ayera nochi 10 morto ku a keda reportá. Ta teme ku e kantidat di hende ku lo por a pèrdè nan bida riba Jamaica lo ta muchu mas tantu.
Melissa a yega Jamaica komo orkan kategoria 5 (máksimo) i bientunan di te ku 295 km pa ora, pero miéntras ku e tabata krusa riba e isla el a degradá pa kategoria 4 segun Sentro Nashonal di Orkan (NHC) di Merka. Pero NHC ta atvertí ku e ta sigui komo un tormenta hopi “poderoso” ku bientunan te ku 250 km pa ora.
Den oranan lat di atardi NHC a informá ku wowo dje orkan a bandoná e isla via di kosta nort i awor ta dirigí su mes pa e provinsianan kubano di Granma, Santiago de Cuba i Guantánamo. Jamaica a pasa bastante ora ta sufri di bientunan ekstremo provoká pa Melissa, un dje orkannan di mas fuerte kua registrá den Atlántiko, pa kolmo hopi slo i hasiendo hopi destrukshon. Su forsa ta superá esun di algun dje orkannan mas devastador di último añanan, manera Katrina, ku a bari e siudat di New Orleans den2005.
“Bosnan kuida kurpa, Jamaica” segun e sprinter olímpiko Usain Bolt, un dje figuranan mas famoso dje isla, a publiká riba X.
Mientras tantu, pa ayera nochi Melissa tabata yegando Cuba. Konseho di Defensa Nashonal a deklará “fase di alarma” den e seis provinsianan ost (Santiago de Cuba, Guantánamo, Holguín, Camagüey, Granma i Las Tunas).
Na Jamaica, Krus Kòrá, ku a distribuí awa portabel i pakinan di higiena teniendo kuenta ku posibel interupshon di servisionan, a señalá ku e “lentitut” di Melissa ta oumentá e ansiedat. “Bo ta spera ku kisas e ta pasa den kuater ora, pero ku Melissa no tabata asina”, segun un bosero di Krus Kora.
