Un mònster di un orkan den oranan di ayera nochi tabata riba kaminda pa Jamaica, ku potensial pa sigui krese for di kategoria 4 i alkansá kategoria 5 den oranan di awe mardugá.
SANTO DOMINGO. – Outoridatnan di Rep. Dominikana ayera a hasi uso di drones pa manda kuminda pa famianan inkomuniká debí na inundashon kousá pa e orkan Melissa. Imágennan kaptá pa drones ta mustra zonanan kompletamente inundá pa motibu dje riunan ku a krese i ku ta hasi imposibel pa drenta òf sali na di sierto parti.
Den oranan di ayera tardi Sentro Nashonal di Orkan di Merka (CNH) a informá ku Melissa a konbertí den un orkan kategoria 4, ku bientunan di 224 km pa ora.
Mas ku 3.700 persona a keda evakuá pa motibu di Melissa. No ménos ku 48 komunidat batata sin komunikashon. A menshoná e kantidat di 4 morto na Rep. Dominikana i Haiti.
Despues di Rep. Dominikana, Melissa a kue direkshon pa Jamaica. Ta e di diestres tormenta tropikal di temporada den Atlántiko.
Direkshon pa Jamaica
Ayera nochi Melissa ku forsa di kategoria 4 tabata direkshon pa Jamaica ku bientunan di 230 km pa ora. E pronóstiko di National Hurricane Center a indiká ku e bientunan lo sigui kue forsa den oranan di anochi i ku awe mardugá e orkan lo a krese bira kategoria 5. Ta pronostiká áwaseru ku por alkansá te hasta un (1) meter di altura ku lo yena e isla ku awa.
“Na Jamaica nan mester ta kla pa resistí e situashon aki durante di vários dia. “E kondishonnan lo deteriorá hopi, pero hopi lihé den próksimo oranan “, segun informashon ofisial den oranan trempan di ayera nochi.
