ABUJA, NIGERIA.- Lidernan di West Afrika a disidí di hisa nan grado di menasa kontra e grupo dje gòlpi militar na Niger, bisando ku e posibilidat pa hasi uso di forsa brutu ta eminente. Den un kumbre di emergensia di e Komunidat Ekonómiko di Estadonan West Afrikano, miembronan a disidí pa ordená entrada di forsanan militar na Niger pa pone òrdu i reinstalá e presidente ku a keda eligí di akuerdo ku konstitushon, ku ta Mohamed Bazoum.
Por bisa ku e bloke aki ya kaba a pone un deadline pa djadumingu pasá pa e grupo rebelde ku a monta un gòlpi militar for di dia 26 di yüli i awor nan ta ser konfrontá ku un intervenshon ya ku nan a ignorá e deadline. No tin ningun opshon ku a ser kitá fo’i mesa, i esei ta enserá tambe uso di forsa militar.
