Menor di edat a guli awa den pisina
WILLEMSTAD.- Polis ta informá un kaso di un menor di edat ku a guli awa den un pisina. Un biaha mas nos ke pidi atenshon di tur hende enpartikular ku tin pisina na kas òf si ta bishitá un hende ku pisina.
Segun e informe di polis, Sentral di Polis a risibí informashon ku na un adrès na Papaya bij Westpunt, un menor di edat a guli un kantidat di awa i ta for di su konosementu.
Un ambulans di EHBO Blauwe Kruis a keda dirigí pa duna promé asistensia na e víktima. Despues ambulans di FKA ku tambe a yega rápidamente a kontinuá ku reanimashon di e menor, pa despues transport’é pa Sala di Emergensia di C.M.C.
Nos ta kòrda ku den fin di aña pasá CMC a alertá riba e tipo di kasonan aki i a duna rekomendashonnan.
Dòkternan di mucha a enfatisá na e okashon ei i e ta konta ainda, pa tur mucha sin diploma di landa bisti banchi di landa òf “zwemvest” na tur momentu i pa nan ta bou di supervishon konstante ora nan ta den òf serka di awa. Ta urgi mayor/adultonan pa semper mantené bista riba muchanan na tur momentu.
Insidente di kasi hoga por tin efekto serio i duradero riba muchanan, asta si nan sobrebibí. Segun ekspertonan di CMC, e konsekuensianan aki por inkluí:
Síntomanan Retardá: E mucha por parse manera ku e ta bon djis despues di e insidente, pero komplikashon por surgi algun ora òf dia despues.
Hipoksia: Falta di oksígeno miéntras e tabata bou di awa por kousa daño na kurpa i e serebro, afektando abilidat kognitivo i e abilidat pa move òf kontrolá su kurpa.
Neumonia: Inhalashon di awa por kousa infekshon den pulmon, ku por resultá den difikultat pa hala rosea.
Impakto Sikológiko: Mucha por sintié hanshá, keda ku miedu di awa, òf keda ku trastorno pos-troumátiko (PTSD) despues di e insidente.
Problemanan di Desaroyo despues: Kaso severo por resultá den daño neurológiko permanente, ku por afektá siñamentu i komportashon.
Un biaha mas e petishon ta pa tuma na kuenta e loke nos a menshoná ariba i pone atenshon na e sugerensia ora ta bai pisina òf laman ku un menor di edat ku no tin diploma di landa.
