CARACAS (AFP).- Gobièrnu di Venezuela a anunsiá redukshon di dia di trabou den gobièrnu debí na “energia di klima” ku ta keda reflehá pa bahada den depósitonan di awa, loke ta vital pa produkshon di koriente den e pais.
E medida, ku awe ta drenta na vigor, ta rekordá riba esnan apliká durante di añanan 2016 i 2018 pa e presidente Nicolas Maduro. E tempu ei el a alertá riba bahada di nivel di awa den e hidroelektriko di Guri, ku ta generá 80% di koriente dje pais,
E situashon di klima ku ta kondusí na oumento di temperatura rònt mundu, ta afektá e nivel di awa den e depósitonan ku mester keda usá pa generá koriente”, segun gobièrnu ta bisa den un komunikado.
Pa e motibu ei lo ahustá ora di trabou for di 8or di mainta pa 12:30 di mèrdia durante dje próksimo seis simannan”. Ademas, “ta deklará e 1×1, ku ta konsistí di un dia di trabou pa un dia ku no ta traha”.
Ku esei, trabou den ofisinanan públiko ta keda redusí na tres dia pa siman, ku kada dia di trabou di kuater ora i mei.
Gobièrnu a hasi un yamada riba poblashon pa kompañá e akshonnan ku medidanan manera “ahustá temperatura di èrko na 23°C, probechá hasi uso di lus natural i deskonektá aparatonan di koriente na momento ku nan no ta den uzo.
Entre 2019 i 2024 e pais a keda den skuridat pa vários dia debí na black-out, ku ekspertonan ta atribuí na falta di mantenshon mientras ku gobièrnu ta referí na sabotahe.
