Mensahenan ku un toke kómiko riba Tik Tok

2579

Tik Tok ta un plataforma hopi popular riba media sosial. Real Braaa di Bryan Adamus a hala nos atenshon ku su mensahenan fuerte i tin bia ku un toke chistoso. Praktikamentu tur djaluna e tin un mensahe ku ta hala atenshon.

Bryan a konta nos ku e ta un rèper i tin basta ratu riba Facebook i Instagram i Youtube. E Tik Tok sinembargo e tabata mir’é semper pero no a forma parti di dje. Dado momentu el a mustra un amigu di dje un video ku el a graba i esaki a bis’é pa e manda e video Tik Tok. Asina Bryan a sera konosí ku Tik Tok, danki na su bon amigu Alejandro Maria. Esaki a sosodé dos aña pasá na 2020 ora Bryan  ku a traha un video spesial riba Tik Tok.

 

Real braaa…

 

Bryan ta rèp for di 2004 bin ariba. Tantu Facebook komo Youtube ta esnan ku e tabata mas será kuné. Su nòmber artista tabata promé Real Bryan i un amigu di dje a dun’é e nòmber di Real Braaa i esei a pega i esei el a keda usa.

 

Diferente di otronan…

 

E ta konsiderá su mes diferente di otronan. E ta pone atenshon riba pone hende hari, bisa algu sin usa palabra malu ta su meta. “Nos pone hende hari, nos por pone hende kambia di idea usando palabranan ‘rustig’ i kisas un tiki kick den dje”. E no ta haña ku ta nesesario pa usa palabra malu pa hende por skuch’é òf pa e hasi su mes konosí. El a bisa Djasabra ku tin palabranan i frasenan ku ta kapta atenshon i esei ta su kos. “Nada di palabra malu pero bin stret, un tiki kómiko pero tòg ‘netjes’”.

E inspirashon…

 

Su inspirashon ta bin riba kama, den baño, mirando kosnan, hopi bia un kos ta pasa i e ta pensa mesora pa papia di dje. I asina mes tin ora e ta haña hendenan ku ta reakshoná riba su videonan ku ta dun’é idea tambe pa e manda su mensahenan.

 

Siguidónan…

 

Pa loke ta e kantidat di hendenan ku ta siguié, el a bisa ku e no tin un idea riba Tik Tok kuantu tin pero e sa si ku ora e tabata solamente riba Facebook dado momentu e 5 mil “friends” a yena. Awor aki e ta wak hendenan ku no tei mas e tin di kita pa e por aseptá otronan ku a pidi pa ta amigu kuné riba Facebook. Tin hende tin manera 3 ‘profile’ i e ta bezig tiki tiki ta seftanan pa asina e por permití mas hende sera konosí ku su videonan.

 

Tik Tok ta un bon posibilidat…

Bryan a bisa ku loke e tin riba Tik Tok e ta pone riba Facebook tambe. E ta pone su videonan riba Tik Tok promé i despues riba Facebook. Esaki pasobra no ta tur hende tin un kuenta riba Tik Tok i p’esei e ke kumpli ku tur dos esta tantu Facebook komo Tik Tok. E ta haña ku por yega leu ku Tik Tok. El a mira kantikanan ku a bira famá dor di un pida so di dje riba Tik Tok. Por hasi bon uso di e fasilidatnan ku Tik Tok ta ofresé. Por promové bo mes grátis riba hopi kos. E ta haña e plataforma aki unu hopi bon.

 

Promé video na 2020…

 

E reakshon ku e ta haña riba su videonan ta hopi. E por laga di komentá riba e kantidat di komentarionan ku e ta haña pero e ta “like” nan si. Tempu el a kuminsá na 2020 Bryan ta kòrda ku su promé video tabata unu ku e ta papia di fiesta di 2010 kompará ku gainan den fiesta na 020. Na 2010 por mira e guynan ku bòter den fiesta pero na 2020 tur ta ku blas den man. E reakshonnan tabata hopi i nan tabata un empuhe pa e por a sigui ku mas video.

 

Diki Lovers ta e video mas gustá i kompartí…

E no tin un idea si ta hende muhé òf hende hòmber ta esnan ku ta siguié, ni ku ta grandi òf chikí. E ta tuma nota si di e hendenan ku ta siguié i e sa ku nan ta bastante. I di tur e videonan ku el a haña mas like i share tabata esun di Diki Lovers. Den e video ei el a papia di e hende muhé diki nan ku si bo tin di dal bo shòrt, dal e i no wòri ku e aparensia. E mes a keda sorprendé di kuantu hende a gusta i a kompartí e video ei di dje. E video ei a bai viral hopi lihé. Esaki a pone ku asta el a saka un kantika ku su video clip kaminda e ta papia di e pekinan diki.  El a hasi esaki pasobra el a ripará ku for di chikí e damanan diki ta preferá keda paden i skonde pasobra na ta diki. I p’esei tabata importante pa e mustra ku nan tambe ta konta.

 

Rèper for di 2004…

 

For di 2004 tempu di PLTS e tabata rèp. E tabata den un grupo ku yama Endless, despues a drenta un grupo di banda di kas ku tabata yama Guynan bashí.  Despues nan mes a bira guynan Rich i despues el a sigui riba su so te e dia di awe. Komo rèper, su lastu kantika tabata na 2021. Tabata un kantika na spañó. Ora COVID a kai aden, komo e no tin spònser i no tin un kas diskero e no por keda saka disko den bashí i p’esei el a wanta un ratu. E no por a sigui invertí su so den kantikanan ku ta drei den bashí. I tirando un bista riba e desaroyo di rèpmentu, el a bisa ku e ta aña esaki hopi bon. Antes ta tiki hende tabata rèp pero awendia tin algun guy yòn hopi talentoso.

Mensahe positivo…

 

No di awor pero ta semper den tur loke Bryan hasi, su mensahenan positivo ta bin dilanti. E ta kòrda ku el a kanta den su rèpnan pa stòp ku atrako. Hopi bia e ta di focus riba e tipo di kantikanan ei. E no sa presis kuantu video e tin pero tur djaluna e ta bin ku un mensahe i den siman e kosnan ta bira poko mas kómiko.

 

No kopia…

 

Bryan a bisa ku tin hóben ku tin talento pero nan mes no sa. Pero si bo tira un video i mira hende a reakshoná, nunka bo sa unda bo suerte te pasobra kisas un hende di komedia ta wak e video i por aserka bu. Aweró bo ta un artista sin a imaginá. Ku Tik Tok bo tin hopi alkanse kuné. Sigur si us’é bon, pensa bo kosnan apart i no kopia kos di hende i asina bo por yega leu.

 

Esun ku mi gusta mas…

Di tur su videonan, esun ku Bryan personalmente a gusta mas ta “Nan a bals bo”. Esei ta e video ku echt el a gosa.  E ta kòrda un kolega di dje ta usa e palabra “bals” ei pero nan ku nan na trabou. No ta algu ku ta tende den kaya. I papiando e kos a sali manera hopi bia ta sosodé den su videonan. E ta bin ku su mensahenan i loke sali ta sali i e dia ei a sali “Nan a bals bo”. Kiko e ta nifiká. Segun Bryan nan a bals bo ta manera nan a tuma bu hasi òf ku nan a gaña bu, Por us’é diferente sistema. Ta manera ora bo trapa riba un bals i bo ta haña un sentimentu malu i ta e kos ei e ke men.

 

 

 

 

 

 

 

 

LAGA UN KOMENTARIO

Please enter your comment!
Please enter your name here