Manipulando ku statutonan
WIILLEMSTAD.- Eks parlamentario, aktual kolaboradó di frakshon i alabes miembro di Partido Nashonal di Pueblo (PNP), Gwendell Mercelina den un karta dirigí pa direktiva di partido a ekspresá su preokupashon kon a manehá e reunion general di miembresia (“algemene ledenvergadering, alv) di djaluna 4 di mei último. Un reunion ku, na su opinion, e direktiva a frustra deliberadamente.
“Loke nos a presensiá ayera nochi na Kas di Pueblo ta profundamente lamentabel”, Mercelina ta skibi den su karta ku a kai den “brievenbus” di redakshon di EXTRA. “E desishon di presidente di partido pa klousurá e quorum eksaktamente algun minüt pasá di 7’or di anochi, un orario ku, konosiendo bida diario di nos miembronan (asta di prominentenan), ta algu no usual, no ta un akto di bon ehèmpel ni di bon kondukta pa gobernashon.”
Segun Mercelina e aktuashon di e presidente (Dudley Lucia, red.) ta un intento kla i bisto pa tapa boka di e miembronan ku a firma un petishon pa e reunion tuma lugá. “Pero, no nan so sino di tur miembro di e vehíkulo polítiko.”
Sera e lista di presensia asta miéntras tin hende den rei pará pa drenta, sin duna e miembronan ku a presentá un márgen di tempu rasonabel òf un ‘kuartu di ora akadémiko’ kustumbrá, ta inaseptabel i un falta di rèspèt, Mercelina ta bisa. “E relashon entre un partido i su miembronan mester ta basá riba loke ta rasonabel (“redelijkheid en billijkheid Art. 2:8 BW”). E uso di e ora eksakto komo un liña di guia pa para e reunion, ta un uso robes di reglanan formal pa blòkia un proseso demokrátiko.”
Esaki den término hurídiko ta yama “détournement de pouvoir” (abusu di poder), Mercelina ta indiká mas aleu. “Statutonan t’ei pa fasilitá e bos di e miembro, no pa strob’é. E alv aki no tabata kualke reunion. E ta e resultado direkto di un petishon firmá pa un kantidat grandi di miembro ku ta eksigí nan derecho demokrátiko pa reuní i deliberá riba e krísis ku tin.
Klousurá e quorum na e forma aki ta mustra falta di rèspèt pa e mandato di e base di partido, Mercelina ta bisa mas aleu. Segun e por a skucha for di algun miembro di direktiva, mester mira e akto di 4 di mei komo un kastigu (“straf”) pa e miembronan ku semper ta para riba kumplimentu ku statutonan. “Doktoor a bisa semper: no hasi ku otro loke bo no ke pa otro hasi ku bo.”
E ta sigui bisa: “Nos ta bati riba nos pechu yama nos mes kristian demókrata, pero den nos akshonnan esaki ta laga kompletamente di deseá. Esaki ta un funshonamentu di kumbinensia i di ‘kani mi pa mi kani bo’. Statutonan t’ei pa protehá nos demokrasia interno, i no pa usa nan kada bes komo un arma kontra e propio partido ku a akseptá nan.”
Ta e miembronan ta skohe e presidente i direktiva pa nan karga e responsabilidat pa biba segun e statutonan aki, Mercelina ta splika mas aleu. Riba dje, e echo ku presidente, meskos ku supuesto miembronan anónimo, a skohe pa aserká i kontestá prensa promé ku e propio miembresia a haña e chèns di komuniká ku otro, ta duna forsa pa debilitá e imágen di nos partido.
Esaki segun e ta kompletamente innesesario. “Asta si esaki ta e manera kustumbrá di operá, direktiva mester realisá ku ta pa e motibunan aki bo no ta bira atraktivo pa kosnan nobo i distinto. E ta stroba desaroyo.”
Despues di loke a akontesé djaluna PNP atrobe ta den un lus lamentabel den publisidat, Mercelina ta konstatá. “Parse ku nos ta keda tira nos mes den nos propio pia, sin komprondé kiko ta e strategia i agènda tras di tur e kosnan aki. Alabes, falta di quorum no ta nifiká ku e agènda ta kaduká i ta anulá e reunion.”
Al kontrario, e ta bisa. “Konforme derecho di asosiashon i nos prinsipionan statutario, ora no tin quorum, e reunion mester keda posponé pa habri esaki mas lihé ku ta posibel.” Pa e motibu aki Mercelina ta pidi direktiva pa mesora konvoká un di dos alv, denter di e periodo statutario, manteniendo eksaktamente e mesun agènda.
“Manera ta kustumber pa e di dos reunion e rekisito di quorum no ta aplikabel mas pa por tuma desishonnan bálido. Pa nos por wanta komo e partido di oposishon mas grandi kontra un mayoria outokrátiko i dominante, PNP mester operá for di un posishon di liderazgo i strategia profundo.”
Ta di e forma aki so Mercelina ta kere ku PNP por keda relevante, konfiabel i ku impakto enfoká pa e pueblo di Kòrsou di awendia. “Laga nos siña sikiera for di nos propio historia. Esaki ta rekerí pa nos garantisá koheshon interno i e lealtat na e liña di partido (ounke e ta difísil). Bo no por logra esaki serando boka di bo miembronan ku un oloshi den man.”
Mercelina ta boga pa un direktiva ku ta inspirá miembronan ku nan vishon, diálogo i un rèspèt sinsero (manera a primintí fo’i komienso) pa e reglanan di wega. “Laga mi ta hopi kla: loke ta sosodé aki no ta pa promé bes den e 78 añanan di eksistensia di partido. E ta parse un déjà vu. Mi mensahe di speransa pa esnan ku ta realmente kere den e kousa ta: nos no por laga esaki kibra nos, paso esei ta presis loke e kontrinkante ta deseá.”
Segun e kolaboradó di frakshon e miembronan, ta mas fuerte ku kualke maniobra ku quorum. “Miéntras bo ta den Nashonal no por kastigá ni tapa boka di e miembro (asta di boso den direktiva) pa semper. Si bo ke pa tapa bo boka, bo tin ku bai funshoná den otro partido ku ta tapa e beyesa di demokrasia i tene nan miembronan ketu pa semper, uzando interes personal riba interes general.”
Mercelina ta finalisá bisando di ta warda di forma ofisial riba e fecha nobo pa e di dos konvokashon di alv mas pronto posibel.
