WASHINGTON, AP.- Mayoria merikano ta kere ku e tenshonnan entre su gobièrnu i Rusia i China lo empeorá otro aña. esaki ta konforme un enkuesta publiká djabièrnè. I apesar ku tin indikashonnan di mehorashonnan diplomátiko ku Kim Jong Un riba armanan nuklear, kasi mitar ta opiná meskos riba relashonnan entre Merka i Norkorea.
E enkuesta realisá pa The Associated Press i NORC Center for Public Affaird Research (NORC) a ofresé un bista riba e opinion públiko rondó di e kurso di relashonnan entre Merka i e rivalnan stratégiko aki, 15 luna despues ku Trump a asumí presidensia.
“Trump a habri un kaha di pandora nobo i e ta hasiendo esaki ku demasiado pais na mes momentu”, asina John Parker, di 70 aña di Fort Lauderdale a opiná. “Ta manera e ke hinka nos den problema”.
E enkuesta a detektá ku e merikanonan ta mas pesimista tokante e relashon ku Rusia: 56% ta kere ku e relashonnan ku Rusia lo empeorá durante otro aña i solamente 13% ta kere ku esaki lo mehorá. Asta entre republikanonan, mas ta spera un relashon ku Rusia lo empeorá (40%) na lugá di mehorá (20%), ounke 40% ta spera ku esaki ta sigui meskos.