WASHINGTON, MERKA, AFP.- Merka a bisa djaluna ku lo suavisá restrikshonnan imponé durante presidensia di Donald Trump riba biahenan pa Cuba entre Merka i e isla.
E suavisashon aki sigur lo oumentá petishonnan di visa, inkluyendo na konsulado di La Habana. Pero tòg lo keda prosesá mayoria visa na embahada di Merka na Guyana.
E komunikado a añadí ku lo “fasilitá konekshonnan edukashonal” entre e dos paisnan, inkluyendo sosten na investigashonnan profeshonal i tambe sosten pa ekspandé akseso na internèt.
E kantidat di buelonan permití entre Merka i Cuba tambe lo subi, i lo sirbi otro siudatnan tambe aparte di La Habana.
E minister di Eksterior di Cuba, Bruno Rodriguez, a tweet ku e medida ta “un stap chikitu den e direkshon korekto”, pero el a enfatisá ku esaki no a modifiká e embargo vigente for di 1962.
