WASHINGTON, MERKA, AFP.- Hefe di pentágono Pete Hegseth a anunsiá ayera un atake nobo den Karibe na kosta di Venezuela, kontra un supuesto narko lancha ku un balanse di 4 morto.
“Siguiendo e òrdunan di presidente Trump, mi a dirigí un atake legal kontra un embarkashon narkotrafikante afiliá na e organisashon designa komo terorista”, asina e sekretario di guera a bisa den un mensahe riba X, ku a bai kompaña ku un video.
Kuater hòmber narkoterorista abordo di e embarkashon a muri den e atake, el a añadí.
Den e video ta aparesé un lancha nabegando ku velosidat haltu den laman grandi i despues e impakto ku a destruí esaki totalmente.
“E atake a Sali den awanan internashonal nèt dilanti di kosta di Venezuela miéntras ku e embarkashon tabata transportá kantidat supstansia di narkótiko ku destino pa Merka pa venená nos hendenan”, asina el a indiká mas aleu den un komunikado.
Esaki ta e di sinku atake di Merka den e region, di akuerdo ku e konteo di e propio presidente Donald Trump. E saldo te ainda ta 21 morto.
