RAMALA, MARGEN OKSIDENTAL, AP.- E embahada merikano na Herusalèm mester a kanselá un konferensia organisá na Márgen Oksidental, despues ku funshonario i frakshonnan palestino a pidi pa bòikòt esaki i a menasá ku organisá protestanan.
E mishon diplomátiko a organisá un konferensia na Ramala, ku partisipashon di eks alumnonan di programanan di edukashon merikano, inkluyendo palestinonan di Gaza Strip ku a haña pèrmit di Israel pa partisipá.
E lider palestino ta konsiderá e konferensia komo un intento pa burla di e bòikòt kontra e gobièrnu merikano aktual, ku a rekonosé Herusalèm komo kapital di Israel i tuma otro medidanan ku a laga Palestina konkluí ku e pais no ta un mediadó “parsial” den Medio Oriente.
“Nos ta konsiente di e deklarashonnan relashoná ku un evento planiá ku eks alumnonan di programanan kultural i edukashonal merikano. Nos a disidí pa kanselá e evento pa evitá kualkier difikultat pa e partisipantenan palestino”, asina e embahada a bisa.
Representantenan di vários grupo palestino a organisá un konferensia di prensa na e hotèl kaminda e evento lo a tuma lugá. E embahada a sigurá ku “ta organisá e tipo di eventonan aki pa krea oportunidat pa e merikano i palestinonan interkambiá i kombersá ku otro”.
