Un agente di duana norteamerikano ta pasa meimei dje barínan ku ta kontené kímikonan ku ta usa pa traha droganan sintétiko. Outoridatnan merikano ta bisa ku a konfiská 300.000 kilo di kímiko ku ta usa pa traha mentanfetamina.
PASADENA, USA (AFP).- Merka a anunsiá di a konfiská 13.000 barí ku ta kontené 30.000 kilo di kímiko usá pa fabrikashon di mentanfetamina ku, segun outoridatnan federal, a sali for di China i ku tabatin komo destino e organisashon di droga di Sinaloa, na México. Fiskal dje distrito di Columbia (Washington DC), Jeanine Pirro, a biaha pa Texas pa realisá e anunsio huntu ku e direktor interino di Servisio di Inmigrashon i Kontròl di Duana (CE), Todd Lyons, den loke nan a denominá komo “e mayor konfiskashon di kímiko ku mester a bai pa elaborashon di droga na México”.
E haf di deskarga prinsipal tabata Shanghai, China, i esun di yegada, México”, segun Pirro. El a splika ku e operashon a tuma lugá siman pasá.
Ta trata di sierto tipo di alkohòl i N-metilformamida “ku nan lo a usa pa fabriká 189.000 kilo di metanfetamina, di kua e balor riba kaya den Houston lo a subi te na 569 mion dòler”. Pirro a splika ku e akshon a bira posibel despues ku e presidente Donald Trump i e sekretario di Merka, Marco Rubio, a deklará “Cartel de Sinaloa” komo un organisashon terorista estranhero.
Segun Lyons, hefe di ICE, despues di konsiderá e organisashon di Sinaloa komo terorista, outoridatnan federal awor tin mas posibilidat legal, por ehèmpel pa “sigui e transportenan promé ku nan yega Merka”. E fiskal Pirro ta sigurá ku “kada dia di nobo, tonelada di sustansianan kímiko usá pa droganan sintétiko manera metanfetamin i fentanilo ta keda mandá for di China pa México den un guera no deklará di China kontra di Merka i su siudadanonan”.
