WASHINGTON, USA (AFP).- Merka a outorisá benta di petrolio i gas na Cuba ku e kondishon ku e empresanan mester sigurá nan mes ku e kombustibel lo bai den man di siudadanonan i empresanan di sektor privá, segun Departamento di Finansa di Merka. “Gas i otro produktonan petrolero eksportá i re-eksportá pa entidatnan òf personanan di sektor privá kubano pa uso personal por keda outorisá di akuerdo ku e Eksepshon di Lisensia SCP”, segun Departamento di Finansa.
Despues dje kaida dje presidente venezolano Nicolás Maduro, Washington a anunsiá sanshonnan kontra paisnan òf empresanan ku ker a eksportá petrolio pa Cuba, loke a hinka e pais den un situashon kritiko. E régimen castrista, ku ya tabata den un krísis ekonómiko grave, a anunsiá di tabata dispuesto na negoshá, i pareu ku esei a fleksibilisá e medidanan interno pa importá petrolio. Pa promé biaha den kasi 70 aña, e isla komunista a outorisá e importashon di kombustibel di parti di empresanan privá.
Departamento di Finansa i Departamento di Komersio norteamerikano awor ta splika, debí na preguntanan di “potensial eksportadornan”, kua ta e kondishonnan den e kaso aki. “Pa keda outorisá, e eksportashonnan mester ta pa uso di sektor privá kubano i pa aktividatnan di sektor ekonómiko privá”, segun e teksto.
Merka ya a usa un fórmula nobo algun siman pasá, ora ku a anunsiá yudansa humanitario di urgensia, manera remedinan i kuminda, komo reakshon pa e destrukshon kousá pa e orkan Melissa.
Departamento di Estado a anunsiá miónes di dollar komo yudansa pa e pueblo kubano, pero via di iglesia katóliko
