WASHINGTON, MERKA, AFP.- Presidente merikano Donald Trump, a anunsiá djabièrnè ku e gobièrnu a rekomendá su siudadanonan a protehá nan kara ora nan sali riba kaya pa purba para propagashon di e Coronavirus nobo.
Trump a bisa desde Kas Blanku ku e Sentronan pa Kontrol i Prevenshon di Enfermedat (CDC) ta urgi e pueblo pa kubri nan kara, pero evitá di usa masker pa laga esaki pa trahadónan di salú.
“E kos aki ta boluntario”, asina el a remarká i a agregá ku “mi ta skohe pa no hasi esaki. Un masker na mi kara miéntras mi ta risibí presidentenan, promé ministernan, diktadornan, rei i reinanan, no ta algu mi lo skohe pa hasi”. E alkalde di New York, Bill de Blasio, a hasi un rekomendashon similar na habitantenan di e siudat djaweps.
CDC a bisa ku tur hende mester purba kubri nan kara ora di hasi kompras, un momentu difísil pa kumpli ku distansiamentu sosial. Esaki sigur lo kambia e situashon, mirando ku Organisashon Mundial di Salú i tambe CDC a bisa ku no ta nesesario pa usa un masker sin síntoma di Coronavirus.
