WASHINGTON, MERKA, AFP.- Merka a prohibí entrada di dos eks funshonario di e gobièrnu di Nicolás Maduro, despues ku Washington a bisa ku nan a hunga un ròl den e blackout enorme di aña pasá.
Luis Alfredo Motta, e eks minister di Energia Eléktriko di Venezuela i Eustiquio Jose Lugo, eks vise minister di Finansa, Invershon i Aliansa Stratégiko a wòrdu akusá pa Departamento di Estado pa korupshon i pa aseptá soborno. Ademas ta prohibí nan di drenta Merka.
“Nan a wòrdu designá pa aseptá benefisio finansiero, inkluyendo soborno i komishon klandestino a kambio di entrega kontraktnan lukrativo di e kompania estatal di koriente Corpoelec”, segun indikashon Mike Pompeo.
E dos eks funshonarionan a wòrdu akusá ku malversá fondo públiko pa nan propio benefisio.
E atministrashon di Trump ta dirigiendo un kampaña internashonal pa logra renunsia di Maduro, kende su reelekshon di 2018 ta wòrdu konsiderá ilegal. E ta akusá tambe ku korupshon i abusu grave kontra derechi humano, inkluyendo e situashon ekonómiko deplorabel di e pais.
