WASHINGTON, AP.- E gobièrnu di presidente Donald Trump a rekonosé e resultadonan di elekshon presidensial na Hondúras, apesar di keho di oposishon, iregularidatnan atvertí pa opservadornan i un pedido di Kongreso merikano pa respaldá un elekshon nobo.
Departamento di Estado a felisitá Juan Orlando Hernandez pa su viktoria den elekshon di luna pasá, pero a pidi komishon elektoral pa investigá tur impugnashon. E bosero Heather Nauert a pidi tur parti pa evitá violensia ku a kobra por lo ménos 17 bida den tres siman di mal kontentu sosial. Tambe el a pidi forsanan di seguridat pa respetá derechi di e manifestantenan pasífiko.
Hernandez a wòrdu deklará ganadó, pero a kandidato opositor, Salvador Nasralla a denunsiá ku tabatin froude i a biaha pa Washington pa buska sosten di Merka den Organisashon di Estadonan Amerikano. E opservadornan di OEA i Union Europeo a deskubrí iregularidatnan den e elekshon aki kual a pone e resultadonan den duda.
E promé resultadonan di tribunal elektoral despues di elekshon di 26 di novèmber a nombra Nasralla komo ganadó ku un márgen amplio, despues di kasi 60% di votonan konta. E aktualisashonnan públiko di e konteo a para misteriosamente durante mas di un dia i na momentu ku esaki a reanudá, esaki a disminuí e bentaha di Nasralla kombirtiendo Hernandez den e ganadó.