MIAMI, AP.- Warda Kosta di merikano a informá ku a reskatá kasi 100 migrante haitiano dilanti di Cuba. E migrantenan a wòrdu repatriá.
Ofisialnan di Warda Kosta na Miami a bisa ku e tripulashon di su helikòpter a detektá un boto di 12 meter, kompletamente yen ku migrante serka di Cuba. Outoridat a manda un boto desde Key West pa reskatá e migrantenan, indikando ku e boto no tabata ekipá pa transportá e kantidat di pasahero aki.
Ofisialnan di Warda Kosta ta bisa ku esaki por tabata un situashon di menasa pa bida di e 86 migrantenan na bordo. E migrantenan a haña kuminda, awa i tratamentu médiko. E migrantenan a wòrdu repatriá pa Haiti.
Warda Kosta a informá ku mas o ménos 221 haitiano a purba krusa laman pa emigrá ilegalmente pa Merka desde 1e di òktober.
