WASHINGTON, AP.- Kuater aktivista ku a protagonisá protestanan den e embahada venezolano na Washington durante mas di un luna a wòrdu arestá pa polis, segun indikashon di un aktivista djaweps.
Medea Benjamin, kofundadó di Code Pink, a bisa na The Associated Press ku polis a drenta den e sede diplomátiko mainta pa arestá e aktivistanan ku tabata kedando den esaki.
Un bosero di Departamento di Estado, kende a pidi pa no wòrdu identifiká, a bisa ku agentenan di seguridat “a arestá i desalohá e personanan ku tabata kedando “ilegalmente” den e embahada.
Vários patruya polisial a bandoná e zona mèrdia. Riba un video riba retnan sosial di Code Pink por a mira e aktivistanan, Adrienne Pine, den e asiento patras di un di e patruyanan, afirmando ku “e kos aki ta un òrdu ilegal”.
Mara Verheyden-Jilliard, abogado di e aktivistanan, a bisa ku mester determiná unda e aktivistanan ta i kiko e kargo penal den nan kontra lo ta.
E aktivistanan ta konsiderá ku Nicolás Maduro ta e presidente legítimo di Venezuela, pero Merka i kasi 50 pais mas ta sostené ku su elekshon tabata froudulento i ta respaldá e legislador Juan Guaidó, kende a deklará su mes komo presidente interino di Venezuela.
Guaidó a gradisí e diáspora venezolano pa “ehersé soberania” i rekuperá nos embahada na Washington” i a bisa den un mensahe kòrtiku riba su kuenta di Twitter ku lo inisiá un “proseso di rekuperashon” di e sedenan diplomátiko venezolano rònt mundu. “Nos ta luchando fuerte pa konstruí un Venezuela demokrátiko”.
Inisialmente, por lo ménos 30 aktivista a drenta den e embahada, pero e sifra a redusí gradualmente.
