WASHINGTON,USA (AFP).- Merka ayera a duna di konosé ku e presidente chines, Xi Jinping, no por mehorá relashon ku Oksidente i na mes momento apoyá Rusia, despues ku el a primintí di lo estrechá e relashon ku su kolega Vladimir Putin.
China no por hunga tur dos banda, segun e bosero di Departamento di Estado, Vedante Patel. “E no por tin tur dos i pareu ku esei ke tin mihó relashon ku Europa i otro paisnan miéntras ku pareu ku esei e ta sigui alimentá e menasa di mas grandi ku tin kontra di seguridat europeo”, segun e bosero, refiriendo na e invashon ruso di Ukrania.
Merka ta kalkulá ku China, ounke e no ta manda arma di forma direkto pa Rusia, ta apoyá e industria di defensa ruso, un preokupashon plantiá pa e hefe di diplomasia Antony Blinken durante un bishita na Beijing luna pasá.
E apoyo chines na e industria di defensa ruso “no solamente ta menasá seguridat ukraniano, sino tambe seguridat europeo”, segun Patel a bisa.
Xi i Putin ayera na Beijing a defendé e relashon chines-ruso komo faktor di “stabilidat” i “pas” na mundu.
E presidente ruso a realisá un bishita di dos dia, su promé biaha pa estranhero, for di despues di a keda reeligí den luna di mart i su di dos biahe pa China den poko mas ku seis luna.
E dirigente chines a kaba di regresá di un gira na Europa, kaminda el a defendé e derechi di mantené lasonan ekonómiko normal ku su bisiña ruso.
Den deklarashonnan transmití pa televishon ruso, Xi a duna di konosé ku China “ta spera ku pronto pas i stabilidat lo bin bèk den e kontinente europeo”.
Puntrá pa e apoyo di China na un proseso di pas, Patel a bisa: “Di e manera ku nos ta mir’é, e solushon ta simpel: E federashon Ruso mester retirá for di Ukrania”.
