Hopi t’esnan ku no por imaginá nan mes, pero den kapital chines di Beijing tambe tin restorantnan norteamerikano di ‘fastfood’.
GINEBRA (AFP).- Merka i China a anunsiá “avansenan importante i sustansial”, despues di dos dia di negoshashon na Ginebra riba e impuestonan di duana di Donald Tromp, loke a sòru pa un guera komersial entre e dos paisnan.
Tur dos pais a akordá tambe pa un “mekanismo di konsulta” pa redusí e tenshonnan komersial i a anunsiá ku awe huntu nan lo saka un komunikado.
“Ku plaser mi ta anunsiá ku nos a logra avansenan sustansial entre Merka i China den kòmbersashonnan komersial importante”, segun e Sekretario di Finansa di Merka, Scott Bessent.
E representante di komèrsio norteamerikano, Jamieson Greer, ku tambe ta forma parti
di e negosiashonnan huntu ku e vise promé minister chines, He Lifeng, di su parti a referí na “avansenan importante”.
Den un komunikado, White House a selebrá loke nan a denominá komo “un akuerdo komersial nobo” ku China, sin duna mas detaye.
E guera komersial entre Beijing i Washington a start ora ku Trump adoptá un kantidat grandi di medidanan di impuesto ku a gòlpia spesífikamente China. E gigante asiátiko a respondé ku medidanan fuerte di represaya.
For di kuminsamentu dje aña’kí, e tarifanan imponé pa Merka riba China a subi ku 145, i impuestonan akumulá riba sierto produkto pa alkansá e sifra spantoso di 245%.
Komo respuesta, China a imponé impuesto di 125% riba produktonan norteamerikano i komo resultado e komèrsio bilateral entre e promé dos ekonomianan mundial a stanka.
Direktor general di Organisashon Mundial di Komersio, Ngozi Okonjo-Iweala, a duna di konosé ku e diskushonnan entre Beijing i Washington tabata “un paso positivo i konstruktivo”.
E reunionnan ta tuma lugá den e luhoso residensia di Representante Permanente di Suiza dilanti di Nashonnan Uní na Ginebra.
Donald Trump a duna di konosé ku e promé dia di kòmbersashonnan tras di porta será a registrá “un gran progreso”.
Sekretario di Finansa di Merka Scott Bessent (r) i Representante Komersial di Merka, Jamieson Greeg, papiando ku prensa na final di un wikènt di diskushon komersial ku China.
