WASIHNGTON (AFP).- Departamento di Hustisia norteamerikano ayera a anunsiá un ampliashon di maneranan di aplikashon di pena di morto den kasonan federal, ku tai inkluí e peloton di fusilamentu, elektrokushon i gas letal. Kastigu di morto normalmente ta keda apliká na nivel estatal na Merka, pero gobièrnu federal tambe por solisitá ehekushon a sierto krímen.
“Gobièrnu anterior no a kumpli ku su deber di protehá e pueblo norteamerikano ora ku a nenga pa solisitá pa bin ku kastigu máksimo kontra di krímennan mas peligroso, inkluso teroristanan, asesino di muchanan i asesino di polisnan”, segun e fiskal general interino Todd Banche. Bou di presidente Donad Trump, “Departamento di Hustisia ta sòru pa bolbe kumpli ku lei i bai para na fabor dje víktimanan”, segun Blanchi den un komunikado.
E presidente republikano durante di su promé mandato, den 2020, a pone fin na un pousa di 17 aña di ehekushonnan federal. Tabatin 13 ehekushon ku inyekshon letal durante di último seis lunanan di mandato di Trump, mas ku bou di kualke lider norteamerikano den 120 aña.
Promé di a bandoná White House den yanüari di 2025, e presidente demokrat Joe Biden, opositor di kastigu di morto, a pordoná sentensianan di morto di 37 dje 40 prezunan kondená na esei na nivel federal. Trump, den su promé dia den White House den su di dos mandato, a pidi pa amplia kastigu di morto “pa e krímennan mas baho”.
Aktualmente, sinku estado di Merka a outorisá e peloton di fusilamentu pa ehekushonnan. Nuebe estado ta permití elektrokushon i dos estado resien a ehekutá mediante nitrogeno. Esaki ta konsistí di manda gas den un maskarada, provokando ku e prezu ta stek.
