WASHINGTON, Departamento di Seguridat Nashonal (DHS) kier purba pone fin na un akuerdo hudisial federal ku ta limitá e temporada ku muchanan inmigrante menor di edat por keda detené. Esaki ta un desishon ku sigur lo lòs un pelea nobo den kortenan, relashoná ku e kapasidat di gobièrnu pa detené famianan te ora ku nan kaso keda presentá dilanti di un hues.
Akuerdo Flores, ta rekerí pa e gobièrnu detené e muchanan den un ambiente ménos restriktivo i pa liberá nan mas pronto ku ta posibel, generalmente despues di 20 dia detené. Debí na e restrikshonnan aki, e famianan migrante ku yega Merka a keda liber riba tereno merikano miéntras nan solisitut di asilo a wòrdu prosesá den korte.
E gobièrnu di Donald Trump su prioridat ta pa pone fin na Akuerdo Flores. E funshonarionan di Seguridat Nashonal a indiká ku ta adoptando medidanan ku ta reflehá e akuerdo i ku ya no ta nesesario pa involukrá un korte den e proseso.
E medida aki ta esun mas resien di e gobièrnu federal pa restringí inmigrashon, e tema mas popular riba e agènda polítiko di presidente Donald Trump. Su ophetivo ta pa restringí e kantidat di solisitantenan di asilo den e pais i demotivá migrantenan di krusa frontera.
