WASHINGTON, AP.- E komishon di relashon eksterior di kámara di kongreso merikano a adoptá tres proyekto di lei pa oumentá preshon riba e presidente venezolano Nicolás Maduro.
Un inisiativa ta agregá restrikshonnan na eksportashon di gas lakrimógeno i ekiponan antidisturbio. Un otro ta ordená gobièrnu di Donald Trump pa aportá 150 mion dòler na yudansa humanitario i e terser inisiativa ta pa Departamento di Estado i organismonan di inteligensia evaluá e menasa ku e koperashon entre Rusia i Venezuela ta representá.
Kámara mester vota riba e tres inisiativanan di lei aki ounke no a pone un fecha kaminda esaki mester sosodé.
Merka i mas di 50 gobièrnu ta rekonosé e lider opositor Juan Guaidó komo e presidente legítimo di e pais i ta indiká ku e reelekshon di Maduro tabata froudulento debí ku kandidatonan opositor no a partisipá den esaki.
E tres proposishonnan a wòrdu presentá pa Debbie Mucasel-Powell, Donna Shalala i Debbie Wasserman Schultz, demókratanan ku ta representá vários distrito na sùit di Florida ku un komunidat venezolano importante.
