SAN SALVADOR (AFP).- E Sekretario di Estado di Merka, Marco Rubio, a kalifiká komo “un gran paso” di parti di Panamá pa fortalesé e relashonnan ku Washington, awor ku a disidí pa no renobá e akuerdo ekonómiko ku China, destiná pa finansiá infrastruktura di kanal di Panamá.
Rubio a duna di konosé ku e desishon dje presidente panameño, José Raúl Mulino, pa bandoná ideanan impulsá pa Beijing “ta un gran paso padilanti pa e relashonnan entre Merka i Panamá”.
Djadumingu último, despues di a reuní ku Rubio, Mulino a anunsiá di lo laga e akuerdo ku China vense den aña 2017, na momento ku e nashon sentroamerikano ta enfrentá preshon di parti di Washington pa frena e “influensia chines” riba kanal di Panamá.
E akuerdo ekonómiko, lansá den aña 2013, ta símbolo dje gobièrnu di presidente Xi Jinping i ta kontemplá e finansiamentu di proyektonan di infrastruktura ku fondonan chines. Mas ku shen pais a gusta e akuerdo ei.
Mulino mas aleu a trese dilanti di ke mira, te hasta promé ku esei, si lo por pone un banda e akuerdo firmá e tempu ei pa e presidente Juan Carlos Varela (2014-2019), ounke e no a duna fecha.
Komentando e desishon di Mulino, Rubio a referí na e papel di presidente Donald Trump pa “protehá e seguridat i brinda prosperidat” na e pueblo norteamerikano.
“Ta un desishon lamentabel pasobra e ta un inisiativa ekonómiko i ku e no tin nada di hasi ku ningun agènda polítiko”, segun e representante di China na Nashonnan Uni, Fu Chong.
Panamá ta nenga ku China ta ehersé kontròl riba e kanal pero Washington ta konsiderá komo un “menasa” pa su seguridat ku un empresa di Hong Kong ta manehá e hafnan na e entrada dje kanal, konstruí pa Merka i entregá na e panameñonan den aña 1999 kumpliendo ku tratadonan bilateral.