CARACAS (AFp).- Gobièrnu di Merka ayera a emití un alerta nobo di biahe pa Venezuela, afirmando ku ta eksistí “riesgo haltu” di detenshon pa siudadanonan norteamerikano. Di su parti, na Caracas nan a denunsiá un kampaña di deskredito kontra dje pais karibense.
Despues di a kibra e relashonnan ku e gobièrnu sosialista di Nicolás Maduro den 2019 durante e promé gobièrnu di Donald Trump (2017-2021), Merka a ubiká Venezuela den e nivel máksimo di alerta (no biaha) pa “delitonan, disturbio, servisionan defisiente di salú, sekuestro i detenshonnan pa loko”.
Un alerta similar a keda emití pa outoridatnan norteamerikano den yüli di 2022. “No biaha ni keda Venezuela debí na e riesgo haltu di detenshon inhustu, tortura, terorismo, sekuestro, aplikashon arbitrario di leinan lokal, delinkuensia, disturbionan sivil i defisiente infrastruktura sanitario”, segun Departamento di Estado norteamerikano a publiká ayera.
E organisashon Foro Penal, ku ta dokumentá arestonan pa rasonnan polítiko, den luna di febrüari a indiká ku tabatin shete siudadano detené di forma arbitrario na Venezuela, di kua dos tin e státus di residente.
“Ta rekomendá tur siudadano norteamerikano i residentenan permanente legal den Venezuela pa sali dirèkt for dje pais”, segun e teksto.
Den mart di 2019, Merka a evakuá su personal diplomátiko di Venezuela, dos luna despues ku Caracas a anunsiá kiebro di relashon komo reakshon pa e echo ku Washington a rekonosé e gobièrnu interino enkabesá di forma simbóliko pa e opositor Juan Guaidó.
Venezuela di forma kategóriko ta rechasá e alerta di biahe emití pa Departamento di Estado di Merka”, segun gobièrnu venezolano den un komunikado.
Ta trata di “un akto hostil kargá ku sinismo, rasismo i propaganda polítiko, ku ta buska pa alimentá e kampaña di agreshon permanente kontra di nos pais”, segun e teksto.
E gobièrnu di Maduro ta konsiderá, ademas, ku “Merka ta karesé di outoridat moral pa papia di derechinan humano” pa e trato ku a duna na migrantenan venezolano “sekuestrá den El Salvador” i “someté nan na trato inhumano”.
“E imágennan di muchanan den kouchi, mamanan separá di nan yunan, deportashon arbitrario i sentronan di detenshon ta laga nos kòrda riba e kamponan di konsentrashon ku ta sigui estremesé mundu”, segun e gobièrnu di Caracas a remarká.
